హైదరాబాద్ సిటీబ్యూరో, డిసెంబర్ 18 (నమస్తే తెలంగాణ): జన్యు క్రమం విశ్లేషణతో అంతు చిక్కని వ్యాధుల ఆచూకీ తెలుసుకొనే ఆవకాశం ఉందని సెంటర్ ఫర్ సెల్యులర్ అండ్ మాలిక్యులర్ బయాలజీ (సీసీఎంబీ) భావిస్తున్నది. రాతి యుగం నాటి మానవులు, ఆధునిక మానవుల జన్యువులను సునిశితంగా అధ్యయనం చేసిన సీసీఎంబీ పరిశోధకులు కొన్ని ముఖ్యమైన విషయాలను కనుగొన్నారు. కొంతకాలంగా ఆది మానవులకు చెందిన సంరక్షించబడిన జన్యువులపై సీసీఎం అధ్యయనం చేస్తున్నది.
డాక్టర్ జీ ఉమాపతి, శివకుమారా, త్రివేది వంటి ప్రముఖ పరిశోధకులు తమ పరిశోధన ఫలితాలను ఇటీవల ప్రచురించారు. పది లక్షల సంవత్సరాలు గడుస్తున్నా.. ఇప్పటికీ కొన్ని జన్యువులలో రూపాంతరం జరగలేదని, వీటిలో ప్రొటీన్ రహిత కోడింగ్, ప్రొటీన్ సహిత జన్యువుల కోడింగ్ ప్రాంతాన్ని గుర్తించి, లోతుగా విశ్లేషిస్తే మరెన్నో విషయాలు వెలుగులోకి వచ్చే అవకాశం ఉందని భావిస్తున్నారు. ముఖ్యంగా అంతు చిక్కని వ్యాధుల గుట్టు బయటపడుతుందని, తద్వారా వ్యాధి నిర్ధారణ, మెరుగైన చికిత్స విధానాలకు రూపకల్పన చేసేందుకు ఆస్కారం ఉంటుందని అంచనా వేస్తున్నారు.