OU | ఉస్మానియా యూనివర్సిటీ, జూలై 10 : ఉస్మానియా విశ్వవిద్యాలయంపై కాంగ్రెస్ ప్రభుత్వం ఉక్కుపాదం మోపుతున్నది. ఎన్నో పోరాటాలకు వేదికైన ఓయూలో మరోసారి రాజుకున్న ఉద్యమ వేడిని అణచివేసేందుకు నిర్బంధకాండ కొనసాగిస్తున్నది. ఉద్యోగాల కోసం నిరుద్యోగులు కొన్ని రోజులుగా నిరసన జ్వాల రగిలిస్తుండగా, డీఎస్సీ వాయిదా కోసం అభ్యర్థులు రెండు రోజులుగా ఆందోళనలను ఉధృతం చేశారు. రాష్ట్రంలోని అన్ని యూనివర్సిటీలు ఇన్చార్జిల పాలన లో కునారిల్లుతున్నాయని, తక్షణమే రెగ్యులర్ వీసీల కోసం ప్రభుత్వంపై ఒత్తిడి తేడాలని డిమాండ్ చేస్తూ ప్రొఫెసర్ కోదండరాం ఇంటి ముట్టడికి తెలంగాణ స్టూడెంట్ పరిషత్ (టీఎస్పీ) రాష్ట్ర అధ్యక్షుడు బారి అశోక్కుమార్ పిలుపునిచ్చారు. ఈ క్రమంలో ఓయూలో బుధవారం ఉద్రిక్త పరిస్థితులు తలెత్తి రణరంగాన్ని తలపించింది.
వరుస ఉద్యమాలతో అట్టుడుకున్న ఉస్మానియా క్యాంపస్ రెండు రోజులుగా ఖాకీల ప్రహారాలోకి వెళ్లింది. పదేండ్లుగా ప్రశాంతంగా ఉన్న విశ్వవిద్యాలయంలో మళ్లీ పోలీసుల బూట్లు, లాఠీల చప్పుళ్లు వినిపించాయి. శాంతియుతంగా నిరసన తెలుపుతున్న విద్యార్థులపై పోలీసులు పిడిగుద్దులు కురిపించడం, హాస్టళ్లలోకి చొరబడి విద్యార్థి నేతలను అరెస్ట్ చేయడంపై నిరుద్యోగులు, విద్యార్థుల్లో ఆగ్రహం పెల్లుబికింది. నిరుద్యోగుల నిరసనలను ఓయూ మెయిన్ లైబ్రరీ నుంచి లైవ్ ఇస్తున్న వీడియో జర్నలిస్టులు (జీ తెలుగు న్యూస్ రిపోర్టర్ శ్రీచరణ్, యూ ట్యూబ్ చానల్ విలేకరి మైకేల్)లను బుధవారం గల్లాపట్టి పోలీసులు లాక్కెళ్లడం జర్నలిస్టులోకం ఆగ్రహానికి కారణమైంది.పోలీసుల వైఖరిని జర్నలిస్టు సంఘాల నాయకులు, సీనియర్ జర్నలిస్టులు వంగ సతీశ్రెడ్డి, గౌటి రామకృష్ణ, యాలాల శ్రీధర్ తదితరులు ఖండించారు.
విద్యార్థులపై పిడిగుద్దులు
కాంగ్రెస్ ప్రభుత్వ వైఖరికి వ్యతిరేకంగా రేవంత్రెడ్డి దిష్టిబొమ్మ దహనానికి ప్రయత్నించిన బీఆర్ఎస్వీ నాయకులను పోలీసులు అదుపులోకి తీసుకుని వారిపై పిడిగుద్దులు కురిపించారు. నలుగురు విద్యార్థి నాయకులను అరెస్టు చేశారు. ఈ సందర్భంగా విద్యార్థి నేతలు మాట్లాడుతూ విద్యార్థులు, నిరుద్యోగుల ఆకాంక్షలకు అనుగుణంగా మాట్లాడడమే తమ పాపమా? అని ప్రశ్నించారు. రాష్ట్రంలో పోలీసు రాజ్యం నడుస్తున్నదని మండిపడ్డారు. కాంగ్రెస్ ప్రభుత్వానికి వ్యతిరేకంగా పెద్దపెట్టున నినదించారు. ప్రత్యేక తెలంగాణ ఉద్యమ కాలం నాటి రోజులు గుర్తొస్తున్నాయని ఆవేదన వ్యక్తంచేశారు. నాడు లాఠీదెబ్బలు, బాష్పవాయు ప్రయోగాలు, రబ్బర్ బుల్లెట్లు, ఇనుప కంచెలకు ఎదురొడ్డి పోరాడామని, అదే స్ఫూర్తితో రేవంత్రెడ్డి ప్రభుత్వానికి వ్యతిరేకంగా పోరాడి తమ డిమాండ్లు సాధించుకుంటామని స్పష్టం చేశారు.
ఉదయమే హాస్టళ్లలోకి చొచ్చి..
కోదండరాం ఇంటి ముట్టడి పిలుపు నేపథ్యంలో ఉదయమే పోలీసులు హాస్టళ్లలోకి చొరబడి టీఎస్పీ నాయకులను అదుపులోకి తీసుకున్నారు. రాష్ట్ర అధ్యక్షుడు బారి అశోక్కుమార్, రాష్ట్ర అధికార ప్రతినిధి వెంపటి సురేశ్, ఓయూ అధ్యక్షుడు నూకల మధును గదుల నుంచి బయటకు లాక్కొచ్చి పోలీస్స్టేషన్కు తరలించారు. ఈ సందర్భంలో బారి అశోక్కుమార్ మాట్లాడుతూ ఇన్నిరోజులు వర్సిటీలు, విద్యార్థులు, నిరుద్యోగుల చుట్టూ తిరిగిన ప్రశ్నించే గొంతుకలు ఇప్పుడు ఎక్కడికిపోయాయని ప్రశ్నించారు. వర్సిటీలకు శాశ్వత వీసీల నియామకం లేక రెండు నెలలైందని ఆవేదన వ్యక్తంచేశారు. కాంగ్రెస్ ప్రభుత్వానికి ప్రజలకు వారధిగా ఉంటానని చెప్పిన ప్రొఫెసర్ కోదండరాం దీనిపై తక్షణమే స్పందించాలని డిమాండ్ చేస్తూ తలపెట్టిన కోదండరాం ఇంటి ముట్టడిని అడ్డుకోవడం అప్రజాస్వామికమని ధ్వజమెత్తారు.
మద్దతు ఇచ్చినందుకు అరెస్ట్..
కొంతకాలంగా ఉద్యమిస్తున్న నిరుద్యోగుల పట్ల ప్రభుత్వ నిర్లక్ష్య వైఖరి వీడాలని, నిరుద్యోగులకు మద్దతు ప్రకటించిన బీఆర్ఎస్ రాష్ట్ర కార్యదర్శి జంగయ్య, మిథున్ ప్రసాద్లను సైతం హాస్టళ్లలోని గదుల నుంచి పోలీసులు బలవంతంగా లాక్కెళ్లి అరెస్ట్ చేశారు. ఇక్కడ జంగయ్య మాట్లాడుతూ తమను అక్రమంగా అరెస్టు చేయడం ప్రభుత్వానికి సిగ్గుచేటని అన్నారు. విద్యార్థులు, నిరుద్యోగుల తరఫున పోరాతున్నవాళ్లను హాస్టళ్లలోకి వచ్చి అరెస్టు చేస్తున్నారని ఆవేదన వ్యక్తం చేశారు. రేవంత్రెడ్డి ప్రభుత్వానికి నూకలు చెల్లాయని మండిపడ్డారు. కాంగ్రెస్ మ్యానిఫెస్టోలో ఉన్న రెండు లక్షల ప్రభుత్వ ఉద్యోగాల భర్తీ, జాబ్ క్యాలెండర్ విడుదల, మెగా డీఎస్సీ, గ్రూప్ 2, 3 పోస్టుల పెంపు తదితర హామీలను తక్షణమే అమలు చేయాలని కోరుతుంటే ప్రభుత్వం వాటి నుంచి తప్పించుకునేందుకు తమపైకి పోలీసులను ఎగదోస్తున్నదని ఆగ్రహం వ్యక్తంచేశారు. ఈ అంశాలపై మేధావులు, ప్రజాస్వామికవాదులు స్పందించాలని కోరారు.
పకడ్బందీగా ఉద్యమ ప్రణాళికలు
ఉద్యోగాల కోసం శాంతియుతంగా నిరసన తెలుపుతుంటే పోలీసులు రెచ్చిపోయి తమపై పిడిగుద్దులు గుద్దుతున్నారని, లాఠీచార్జీలు చేస్తున్నారని, తామేమైనా నక్సలైట్లమా? ఉగ్రవాదులమా? అని నిరుద్యోగులు మండిపడుతున్నారు. గ్రూప్-1 మెయిన్స్ కోసం 1:100 నిష్పత్తి అమలు, డీఎస్సీ పరీక్షల వాయిదా సాధ్యం కాదని ముఖ్యమంత్రి రేవంత్రెడ్డి చెప్పడంపై అగ్గిమీద గుగ్గిలమవుతున్నారు.ఓయూతో పాటు కాకతీయ, ఎంజీయూ, తెలంగాణ, శాతవాహన, పాలమూరు తదితర అన్ని యూనివర్సిటీల్లో నిరుద్యోగ కమిటీలు, జేఏసీలు ఏర్పాటు కాబోతున్నట్టు నిరుద్యోగులు తెలిపారు. జిల్లా గ్రంథాలయాల్లోనూ కమిటీలు వేస్తున్నామని, ఈ మేరకు పకడ్బందీ ఉద్యమ ప్రణాళికలతో ముందుకు పోతామని చెప్పారు.
15న సెక్రటేరియట్ ముట్టడి
ఉద్యమ కార్యాచరణలో భాగంగా ఈ నెల 15న సచివాలయం ముట్టడికి నిరుద్యోగులు పిలుపునిచ్చారు. ఈ కార్యక్రమానికి బీఆర్ఎస్ నేత ఆర్ఎస్ ప్రవీణ్కుమా ర్, బీసీ సంక్షేమ సంఘం జాతీయ నేత ఆర్ కృష్ణయ్య, ఇతర పార్టీల నాయకులు సంపూర్ణ మద్దతు ప్రకటించారు. త్వరలో నే ‘చలో న్యూఢిల్లీ’ చేపడతామని విద్యార్థి, నిరుద్యోగ సంఘాల నేతలు వివరించారు. మరోవైపు ఉద్యోగాల కోసం పలువురి నిరాహార దీక్షలు కొనసాగుతున్నాయి.