Kamareddy | ఎల్లారెడ్డి, జూన్ 15 : భూమిని దున్నుకున్న పాపానికి భార్య.. తన కుమారుడు, తండ్రితో కలిసి భర్తను దారుణంగా హత్య చేసిన ఘటన కామారెడ్డి జిల్లా ఎల్లారెడ్డి మండలం సాతెల్లిలో శనివారం చోటుచేసుకున్నది. సాతెల్లికి చెందిన కుర్మ దుర్గయ్య (35)కు, అదే గ్రామానికి చెందిన లక్ష్మితో కొన్నేండ్ల క్రితం వివాహమైంది. వీరికి ఒక కుమారుడు. దంపతుల మధ్య తరచూ గొడవలు జరుగుతుండటంతో పెద్దల సమక్షంలో పలుమార్లు పంచాయితీ పెట్టారు. చాలా రోజులుగా దంపతులు వేరుగా ఉంటున్నారు.
పెద్దల సూచన మేరకు ఉన్న నాలుగు ఎకరాల భూమిలోంచి ఎకరం కుమారుడికి ఇవ్వాలని చెప్పగా, దుర్గయ్య అంగీకరించాడు. ఉన్న నాలుగు ఎకరాలను భార్య ఆధీనంలోకి తీసుకుని సాగు చేసుకుంటున్నది. దుర్గయ్య మూడు రోజుల క్రితం పొలం వద్దకు వెళ్లి అందులో ఎకరం భూమిని దున్నుకున్నాడు. శనివారం ఉదయం మరోమారు పొలం వద్దకు వెళ్లగా, భార్య లక్ష్మి, తన కొడుకు, మామ సాయిలు కలిసి చితకబాది ఇంట్లో పడేసి వెళ్లిపోయారు. స్థానికుల సమాచారంతో 108 సిబ్బంది వచ్చి దుర్గయ్యను దవాఖానకు తరలించారు. కామారెడ్డి వెళ్లేలోపే పరిస్థితి విషమించి మృతి చెందాడు. కేసు నమోదు చేసిన పోలీసులు దర్యాప్తు చేపట్టారు.