రాజన్న సిరిసిల్ల, మే 14 (నమస్తే తెలంగాణ): లోక్సభ ఎన్నికల్లో కాంగ్రెస్, బీజేపీలకు బీఆర్ఎస్ ముచ్చెమటలు పట్టించిందని బీఆర్ఎస్ అధ్యక్షుడు కే తారకరామారావు పేర్కొన్నారు. కేంద్రంలో ఎన్డీయే, ఇండియా కూటములు అధికారంలోకి వచ్చే అవకాశం లేదని, ప్రాంతీయ పార్టీల హవా కొనసాగబోతున్నదని చెప్పారు. బీఆర్ఎస్, వైఎస్సార్సీపీ, బిజూ జనతాదళ్ లాంటి పార్టీలు, ప్రాంతీయశక్తులే రేపు నిర్ణయాత్మకమైన పాత్ర పోషిస్తాయని తెలిపారు. లోక్సభ ఎన్నికల్లో బీఆర్ఎస్కు ఓటు వేసిన ప్రజలందరికీ కృతజ్ఞతలు తెలియజేశారు. మంగళవారం ఆయన రాజన్నసిరిసిల్ల జిల్లా కేంద్రంలోని తెలంగాణభవన్లో పార్లమెంటు ఎన్నికల పోలింగ్ సరళిపై కార్యకర్తలు, నాయకులతో సమీక్షా సమావేశం నిర్వహించారు. ఎన్నికల్లో కష్టపడ్డ కార్యకర్తలు, నాయకులను అభినందించారు. అనంతరం కేటీఆర్ మీడియాతో మాట్లాడుతూ.. కాంగ్రెస్ పార్టీ కరీంనగర్, నిజామాబాద్, సికింద్రాబాద్, మల్కాజిగిరి తదితర నియోజకవర్గాల్లో బలహీనమైన డమ్మీ అభ్యర్థులను నిలబెట్టిందని పేర్కొన్నారు. జీవన్రెడ్డి కరీంనగర్ నుంచి పోటీ చేస్తానంటే, బలవంతంగా నిజామాబాద్లో నిలబెట్టిందని, ఎవరికీ తెలియని వ్యక్తిని కరీంనగర్లో నిలబెట్టిందని, సికింద్రాబాద్ అభ్యర్థి కనీసం ఎన్నికల ప్రచారం కూడా చేయలేదని, మల్కాజిగిరిలో ఆ ప్రాంత ప్రజలకు పరిచయమే లేని అభ్యర్థిని నిలబెట్టిందని వివరించారు.
లోక్సభ ఎన్నికల్లో పార్టీ క్యాడర్, నాయకులు సమన్వయంతో చేసిన కృషి వల్ల తప్పకుండా మంచి ఫలితాలు సాధిస్తామని, అత్యధిక సీట్లు సాధించిన పార్టీగా బీఆర్ఎస్ నిలబడబోతున్నదని కేటీఆర్ ధీమా వ్యక్తంచేశారు. కొన్ని స్థానాల్లో కాంగ్రెస్, మరికొన్ని స్థానాల్లో బీజేపీ తమకు ప్రత్యర్థులుగా ఉన్నా అన్ని స్థానాల్లో దీటుగా పోటీనిచ్చింది బీఆర్ఎస్ పార్టీయేనని స్పష్టం చేశారు. బీఆర్ఎస్ నుంచి కొంతమందిని గుంజుకున్నా తమ క్యాడర్ మాత్రం బలంగా నిలదొక్కుకుని పార్లమెంటు ఎన్నికల్లో అద్భుతమైన పోరాట పటిమను ప్రదర్శించిందని చెప్పారు. పార్లమెంట్ ఎన్నికల్లో పడ్డ కష్టం రేపు జరగబోయే జిల్లా పరిషత్, మండల పరిషత్, పంచాయతీ, మున్సిపల్ ఎన్నికలకు పునాదిరాయి అవుతుందని కార్యకర్తలకు భరోసా కల్పించారు. తెలంగాణ ప్రయోజనాలకు, రాష్ట్ర అభివృద్ధికి బీఆర్ఎస్ పార్టీయే శ్రీరామరక్ష అన్నది రాష్ట్ర ప్రజలకు అర్థమైందని పేర్కొన్నారు. ఐదు నెలల పాలనలో ఎక్కడా లేని ప్రజా వ్యతిరేకతను మూటగట్టుకున్న కాంగ్రెస్ ప్రభుత్వం ఉంటుందన్న గ్యారెంటీ లేదని పేర్కొన్నారు. ఇకనైనా కాంగ్రెస్ పార్టీ బుద్ధి తెచ్చుకుని ఇచ్చిన హామీలను అమలు చెయ్యకపోతే ప్రజా క్షేత్రంలో ధారుణమైన పరాభవం ఎదుర్కోక తప్పదని హెచ్చరించారు.
రాష్ట్రంలో ఐదు నెలలు రాష్ట్రంలో కాంగ్రెస్ పార్టీ టైంపాస్గా ప్రభుత్వాన్ని నడిపిందని కేటీఆర్ ధ్వజమెత్తారు. ప్రజల సమస్యలు, అవసరాల పట్ల అవగాహన లేకుండా చిల్లర మల్లర అంశాలు తీసుకున్నదని మండిపడ్డారు. కొన్ని రోజులు మేడిగడ్డపై, కొన్ని రోజులు శ్వేతపత్రాలు, కొన్ని రోజులు ఫోన్ట్యాపింగ్ అంటూ టైంపాస్ చేస్తూ రకరకాలుగా ప్రజల దృష్టిని మళ్లించేందుకు ప్రయత్నించిందని ధ్వజమెత్తారు. బీఆర్ఎస్ ప్రభుత్వం చేసిన పనులను, కొత్త జిల్లాలను రద్దు చేయడం ద్వారా కేసీఆర్ ఆనవాళ్లు లేకుండా చేయాలన్న కుట్రలు పన్నుతున్నదని విమర్శించారు. చిల్లర రాజకీయాలతో కాంగ్రెస్పై ప్రజల్లో విముఖత ఏర్పడి, ప్రభుత్వం పట్ల వ్యతిరేకతను పెంచిందని చెప్పారు. బీజేపీపై కూడా ప్రజలు పెద్దగా సానుకూలంగా లేరని స్పష్టం చేశారు. రాష్ట్రం నుంచి నలుగురు ఎంపీలను గెలిపించినా తెలంగాణకు ఏమీ ఇవ్వకపోవడం, పెరిగిన పెట్రోలు, డీజిల్, నిత్యావసర వస్తువులు, సిలిండర్ ధరలు కారణంగా బీజేపీపై ప్రజల్లో వ్యతిరేకత పెరిగిందని విశ్లేషించారు.
17 పార్లమెంట్ స్థానాల్లో 12 జనరల్ సీట్లుంటే, అందులో 50% సీట్లు బీసీ అభ్యర్థులకు కేటాయించిన పార్టీ బీఆర్ఎస్ అని కేటీఆర్ తెలిపారు. అత్యధికంగా సీట్లు ఇచ్చి బలహీనవర్గాలకు బీఆర్ఎస్ న్యాయం చేసిందని చెప్పారు. సీనియర్ నాయకులు, పార్టీతో, ప్రజలతో సత్సంబంధాలు కలిగి ఉన్న నాయకులకు తాము టికెట్లు ఇచ్చామని తెలిపారు. కాంగ్రెస్, బీజేపీలు పారాచూట్ లీడర్లకు, బీఆర్ఎస్ నుంచి ఎత్తుకెళ్లినవారికి టికెట్లు ఇచ్చాయని దుయ్యబట్టారు. దాదాపు ఏడుగురు బీజేపీ అభ్యర్థులు, నలుగురు కాంగ్రెస్ అభ్యర్థులు బీఆర్ఎస్ నుంచి వెళ్లిపోయినవారేనని చెప్పారు. కాంగ్రెస్ నిలబెట్టిన అభ్యర్థుల పట్ల సొంత పార్టీలోనే విముఖత వ్యక్తమైందని పేర్కొన్నారు. తమ అభ్యర్థుల పట్ల సానుకూలత, ఆ పార్టీ అభ్యర్థుల పట్ల వ్యతిరేకత కనిపించిందని చెప్పారు. నెల క్రితం బీఆర్ఎస్కు ఒక్క సీటు రాదని సీఎం రేవంత్రెడ్డి వ్యాఖ్యానించారని, కానీ, నెలరోజుల్లోనే జాతీయ పార్టీలకు ముచ్చెమటలు తెప్పించిన ఘనత గులాబీ సైనికులదేనని స్పష్టంచేశారు. సమావేశంలో నాఫ్స్కాబ్ చైర్మన్ కొండూరి రవీందర్రావు, జడ్పీ చైర్పర్సన్ న్యాలకొండ అరుణ, బీఆర్ఎస్ పార్టీ జిల్లా అధ్యక్షుడు తోట ఆగయ్య తదితరులు పాల్గొన్నారు.
రాజకీయ స్వార్థపరుల కుట్రలు, కుతంత్రాలు, దాడులను తిప్పికొడుతూ మొక్కవోని ధైర్యంతో ముందుకుసాగామని, కేసీఆర్ బస్సుయాత్ర రాష్ట్ర రాజకీయాలను ఒక మలుపు తిప్పిందని కేటీఆర్ పేర్కొన్నారు. బస్సుయాత్రతో రెండు జాతీయ పార్టీలు దిగిరాక తప్పలేదని, కాంగ్రెస్, బీజేపీల నాయకత్వం తెలంగాణ చుట్టూ గింగిరాలు కొట్టేలా చేసిందని చెప్పారు. కేసీఆర్ బస్సుయాత్ర ఆదిలాబాద్ నుంచి అలంపూర్ దాకా గులాబీ సైన్యంలో గుండెల నిండా ఆత్మవిశ్వాసం నింపిందని పేర్కొన్నారు. రెండు జాతీయ పార్టీలకు ముచ్చెమటలు పట్టించిన ఘనత కేసీఆర్కే దక్కిందని చెప్పారు.