హైదరాబాద్, జూలై 20 (నమస్తే తెలంగాణ): కాళేశ్వరం ప్రాజెక్టు విషయంలో కాంగ్రెస్ పార్టీ అబద్ధాన్ని వందసార్లు నిజం చేయాలనుకొని అడ్డంగా బుక్కయ్యిందని బీఆర్ఎస్ సోషల్ మీడియా కన్వీనర్ వై సతీష్రెడ్డి విమర్శించారు. తెలంగాణకు ప్రాణధారలాంటి కాళేశ్వరం ప్రాజెక్టును నిర్వీర్యం చేసేందుకు కాంగ్రెస్ చేసిన కుట్రలు నిర్వీర్యమయ్యాయని శనివారం విడుదల చేసిన ప్రకటనలో స్పష్టం చేశారు. భారీ ఎత్తున వరదను తట్టుకుని మేడిగడ్డ బ్యారేజీ ఠీవీగా నిలబడిందని, గతంలో బరాజ్కు వెళ్లి నానా యాగీ చేసిన రాహుల్ గాంధీని ఇప్పుడు తీసుకెళ్లి చూపించాలని ఆయన కాంగ్రెస్కు సూచించారు.
ఒక్క రాహుల్గాంధీయే కాదు, సమస్త కాంగ్రెస్ శ్రేణులు మేడిగడ్డను సందర్శించి తరించాలని ఎద్దేవాచేశారు. ‘మేడిగడ్డ ప్రాజెక్టు కూలిపోయింది.. పడిపోయింది.. పనికిరాకుండాపోయింది’ అని నానా యాగీ చేసిన వాళ్లు ఇప్పుడు కాళేశ్వరం ప్రాజెక్టును చూసిరావాలని చెప్పారు. రూ.80వేల కోట్ల ప్రాజెక్టులో లక్ష కోట్ల అవినీతి జరిగిందని నాడు వ్యాఖ్యానించిన రాహుల్ గాంధీ ఇప్పుడు బరాజ్ను పరిశీలించి వాస్తవాలు తెలుసుకోవాలని హితవుపలికారు. మేడిగడ్డ ఉన్నదా? కొట్టుకుపోయిందా? కూలిపోయిందా? అని హేళన చేసిన అదే కాంగ్రెస్ పార్టీ సమాధానం చెప్పాలని డిమాండ్ చేశారు.