అచ్చంపేట టౌన్, మే 15 : నాగర్కర్నూల్ జిల్లా అచ్చంపేట పట్టణంలో మంగళవారం కాంగ్రెస్ నాయకులు.. బీఆర్ఎస్ నాయకులపై దాడులకు తెగబడటం అత్యంత దారుణమని బీఆర్ఎస్ నాగర్కర్నూల్ ఎంపీ అభ్యర్థి ఆర్ఎస్ ప్రవీణ్కుమార్ అన్నారు. దాడి సమయంలో పోలీసులు ప్రేక్షకపాత్రపోషించడంపై మండిపడ్డారు.
బుధవారం ఆయన బీఆర్ఎస్ నాగర్కర్నూల్ జిల్లా అధ్యక్షుడు గువ్వల బాలరాజుతో కలిసి అచ్చంపేటలో మీడియాతో మాట్లాడారు. దాడి జరుగుతున్నా పోలీసులు చూస్తూ ఉండిపోవడం బాధాకరమని, ఇదంతా చూస్తుంటే 25 ఏండ్లు పోలీస్ శాఖలో పనిచేసి రాష్ట్రపతి చేతుల మీదుగా అత్యున్నత శౌర్య పథకం అందుకున్న తనకు చాలా సిగ్గుగా ఉన్నదని అన్నారు. సెంట్రింగ్ కర్రలతో దాడి చేస్తున్నా.. పోలీసులు దుండగులను అడ్డుకోలేకపోవడంపై మండిపడ్డారు.
దాడి చేసిన వారు కండ్ల ఎదుటే ఉన్నా.. పట్టుకోకుండా ఇప్పుడు పరారీలో ఉన్నారని చెప్పడం అనుమానాలకు తావిస్తున్నదని పేర్కొన్నారు. దాడులకు పాల్పడిన వారిని శిక్షించాలని, న్యాయం కోసం ఎంత వరకైనా వెళ్తామని తేల్చిచెప్పారు. మాజీ ఎమ్మెల్యే గువ్వల బాలరాజు, మున్సిపల్ చైర్మన్ ఎడ్ల నర్సింహగౌడ్ ప్రాణాలకు ప్రమాదమున్నదని.. వారికి ఏమైనా జరిగితే రేవంత్ రెడ్డి బాధ్యతవహించాల్సి ఉంటుందని స్పష్టం చేశారు.
ప్రతిదాడులు మా సంస్కృతి కాదు
బీఆర్ఎస్ నాగర్కర్నూల్ జిల్లా అధ్యక్షుడు గువ్వలబాలరాజు మాట్లాడుతూ దాడులకు ప్రతిదాడులు చేసే సంస్కృతి తమది కాదని అన్నారు. దాడి జరుగుతున్నా పోలీసులు చోద్యం చూస్తూ అధికార పార్టీకి వత్తాసు పలుకుతున్నారని మండిపడ్డారు. పోలింగ్ మరుసటి రోజు కాంగ్రెస్ నేతలు గూండాల్లా వ్యవహరించి బీఆర్ఎస్ కౌన్సిలర్ సుంకరి నిర్మలబాలరాజు ఇంటిపై దాడి చేయడం హేయమైన చర్యగా పేర్కొన్నారు. ఎమ్మెల్యే వంశీకృష్ణ అక్రమ సంపాదనకు మరిగి దాడులకు ప్రేరేపిస్తున్నాడని ఆరోపించారు.