హైదరాబాద్, జూన్ 11 (నమస్తే తెలంగాణ): రాష్ట్ర మంత్రులు ఏ రంగాన్నీ వదలకుండా కుంభకోణాలకు పాల్పడుతున్నారని, బూడిదను కూడా వదలలేదని బీఆర్ఎస్ ఎమ్మెల్యే పాడి కౌశిక్రెడ్డి విమర్శించారు. రామగుండం ఎన్టీపీసీ నుంచి ఫ్లైయాష్ తరలింపులో పొన్నం ప్రభాకర్ భారీ కుంభకోణానికి పాల్పడ్డారని ఆరోపించారు.
ఒక్కో మంత్రి ఒక్కో కుంభకోణానికి పాల్పడుతున్నారని, తాజాగా రేవంత్, పొన్నం (ఆర్పీ) టాక్స్ వసూలు చేస్తున్నారని విమర్శించారు. మంగళవారం ఆయన తెలంగాణభవన్లో మీడియాతో మాట్లాడుతూ.. ఎన్టీపీసీ నుంచి అనుమతికి మించి బూడిదను రవాణా చేస్తూ రో జుకు రూ.90 లక్షల వరకు అక్రమంగా సంపాదిస్తున్నారని ఆరోపించారు.
ఈ మొత్తాన్ని పొన్నం అన్న కొడుకు అనూప్ వసూలు చేస్తున్నారని వెల్లడించారు. 16 టైర్ల లారీలో 36 టన్నులు, 14 టైర్ల లారీలో 32 టన్నుల చొప్పున ఫ్లైయాష్ తరలించాల్సి ఉండగా, 72 టన్నుల వంతున తరలిస్తున్నారని పేర్కొన్నారు. దీనికి సంబంధించిన వే బిల్లులను మీడియాకు చూపించారు. రోజుకు 300 లా రీల చొప్పున రవాణా చేస్తున్నారని, ఒక్కో లారీపై రూ.30 వేల చొప్పున సంపాదిస్తున్నారని ఆరోపించారు.
ఓవర్ లోడ్తో వెళ్తున్న 13 లారీలను తాను స్వయంగా హుజూరాబాద్లో పట్టుకోగా, రెండు లారీలనే సీజ్ చేశారని మండిపడ్డారు. మంత్రి పొన్నం ప్రభాకర్ ఒత్తిళ్లకు రవాణా శాఖ అధికారులు లొంగుతున్నారని ఆయన విమర్శించారు. అక్రమ రవాణాను బీఆర్ఎస్ కార్యకర్తలు అడ్డుకుంటారని హెచ్చరించారు.
ఓవర్లోడ్ లారీలతో ప్రమాదాలు
ఫ్లైయాష్ ఓవర్లోడ్ లారీలతో రోడ్డు ప్రమాదాలు కూడా జరుగుతున్నాయని కౌశిక్రెడ్డి ఆందోళన వ్యక్తంచేశారు. ఇంజినీరింగ్ విద్యార్థి అఖిల్ను ఫ్లైయాష్ లారీ బలి తీసుకున్నదని ఆవేదన వ్యక్తంచేశారు. తరలిస్తున్న ఫ్లైయాష్ వివరాలను ఎన్టీపీసీ ఎందుకు దాస్తున్నదని నిలదీశారు.
ఎన్టీపీసీ అధికారుల తీరుపై ఢిల్లీలో ఫిర్యాదు చేస్తామని హెచ్చరించారు. ఫ్లైయాష్ ఓవర్లోడ్ దందాను ఆపకపోతే తమ పార్టీ ఎమ్మెల్యేల బృందం రామగుండం ఎన్టీపీసీని సందర్శిస్తుందని, తమ క్యాడర్ ప్రత్యక్ష ఆందోళనకు దిగుతుందని ప్రకటించారు. రాబోయేది బీఆర్ఎస్ ప్రభుత్వమేనని, తప్పు చేస్తున్న అధికారుల వివరాలను రెడ్బుక్లో నమోదు చేస్తున్నామని, వారిపై చర్యలు తప్పవని హెచ్చరించారు.
బీఆర్ఎస్ ఎమ్మెల్యేలందరం రాజీనామా చేస్తాం: ఎమ్మెల్యే సంజయ్
కాంగ్రెస్ ప్రభుత్వం ఆరు గ్యారెంటీలు, 13 హామీలను ఆగస్టు 15లోగా అమలు చేస్తే హరీశ్రావు మాత్రమే కాకుండా బీఆర్ఎస్ ఎమ్మెల్యేలందరం రాజీనామా చేస్తామని కోరుట్ల ఎమ్మెల్యే కల్వకుంట్ల సంజయ్ సవాల్ చేశారు. మాజీ మంత్రి హరీశ్రావు కాంగ్రెస్ ప్రభుత్వాన్ని ప్రశ్నిస్తుంటే ప్రభుత్వ విప్ ఆది శ్రీనివాస్ జీర్ణించుకోలేక పోతున్నారని విమర్శించారు. సమావేశంలో ఎమ్మెల్యే కేపీ వివేకానంద పాల్గొన్నారు.