హైదరాబాద్, జూన్ 25 (నమస్తే తెలంగాణ): ఫిరాయింపుదారులపై వేటు పడేవరకు కాంగ్రెస్ను విడిచిపెట్టేది లేదని బీఆర్ఎస్ ఎమ్మెల్యే, మాజీమంత్రి జీ జగదీశ్రెడ్డి హెచ్చరించారు. పార్టీ మారిన ఐదుగురు ఎమ్మెల్యేల సభ్యత్వం రద్దు కావాల్సిందేనని పేర్కొన్నారు. స్పీకర్ సమయం ఇస్తారని భావిస్తున్నామని, తాము ఏ ఒక్కరినీ వదలబోమని, ప్రజల ముందు దోషులుగా నిలబెడతామని పేర్కొన్నారు. మంగళవారం తెలంగాణ భవన్లో ఆయన మీడియాతో మాట్లాడారు. రాష్ట్రంలో ఉన్నది రాహుల్ కాంగ్రెస్సా? రేవంత్ కాంగ్రె స్సా చెప్పాలని ప్రశ్నించారు. ఫిరాయింపుల విషయంలో కాంగ్రెస్ ‘పాంచ్న్యాయ్’కు విరుద్ధంగా ప్రవర్తిస్తున్నదని ధ్వజమెత్తారు. కేంద్రం లో బీజేపీపై రాహుల్ పోరాడుతుంటే ఇక్కడ కాంగ్రెస్ మాత్రం బీజేపీకి తోక పార్టీలా మారిందని ఆరోపించారు.
పార్టీ మారిన ఎమ్మెల్యేలపై పిటిషన్ ఇచ్చేందుకు స్పీకర్ బుధవారం సమయం ఇస్తామని చెప్పారని జగదీశ్రెడ్డి తెలిపారు. స్పీకర్ న్యాయంగా వ్యవహరిస్తారని భావిస్తున్నట్టు చెప్పారు. రేవంత్రెడ్డి పదవిని కాపాడుకునేందుకు ఫిరాయింపులు ప్రోత్సహిస్తున్నారని ఆరోపించారు. ఫిరాయింపులపై హైకోర్టు తీర్పు తర్వాతే సుప్రీం కోర్టును ఆశ్రయిస్తామని పేర్కొన్నారు.
విద్యుత్తుపై విచారణ కమిషన్ను వద్దనడం లేదని, జస్టిస్ నర్సింహారెడ్డిని తప్పించాలని మాత్రమే కోరుతున్నామని తెలిపారు. విచారణలో అన్ని తేటతెల్లం అవుతాయని, కేసీఆర్ మల్లెపూవులా బయటకు వస్తారని చెప్పారు. సమావేశంలో ఎమ్మెల్యే పల్లా రాజేశ్వర్రెడ్డి, ఎమ్మెల్సీ తాతామధు, మాజీ ఎంపీ లింగయ్యయాదవ్, మాజీ ఎమ్మెల్సీ నారదాసు లక్ష్మణ్రావు పాల్గొన్నారు.
హైదరాబాద్, జూన్ 25 (నమస్తే తెలంగాణ): తమ పార్టీలో గెలిచి కాంగ్రెస్లో చేరిన శాసన సభ్యులపై అనర్హత వేటు వేయాలని బీఆర్ఎస్ పార్టీ బుధవారం స్పీకర్కు ఫిర్యాదు చేయనుంది. ఫిర్యాదుకు సమయం ఇవ్వాలంటూ మాజీమంత్రి, ఎమ్మెల్యే జీ జగదీశ్రెడ్డి మంగళవారం స్పీకర్ అపాయింట్మెంట్ కోరారు. మంగళవారం వీలుకాకుంటే బుధవారం తప్పనిసరిగా సమయం ఇస్తానని స్పీకర్ చెప్పినట్టు తెలిపారు.
బీఆర్ఎస్ బీఫాంపై గెలిచి కాంగ్రెస్లో చేరిన బాన్సువాడ ఎమ్మెల్యే పోచారం శ్రీనివాస్రెడ్డి, జగిత్యాల ఎమ్మెల్యే సంజయ్కుమార్పై అనర్హత వేటు వేయాలని బీఆర్ఎస్ స్పీకర్ను కోరనుంది. పార్టీ మారిన దానం నాగేందర్, కడియం శ్రీహరి, తెల్లం వెంకట్రావుపై చర్యలు తీసుకోవాలని బీఆర్ఎస్ ఇప్పటికే ఫిర్యాదు చేసింది. అంతేకాదు, దానంపై అనర్హత వేటు వేయాలని కోరుతూ హైకోర్టును ఆశ్రయించింది. ఈనెల 27న కేసు విచారణకు రానుంది. హైకోర్టు తీర్పు ఆధారంగా అవసరమైతే సుప్రీంకోర్టుకు వెళ్లాలని బీఆర్ఎస్ నిర్ణయించింది.