MLA Jagadish Reddy | హైదరాబాద్ : సింగరేణి బొగ్గు గనులను వేలం వేయడం అనేది.. సింగరేణికి ఉరి వేయడమే అని మాజీ మంత్రి, సూర్యాపేట ఎమ్మెల్యే జగదీశ్ రెడ్డి పేర్కొన్నారు. తెలంగాణ భవన్లో జగదీశ్ రెడ్డి మీడియాతో మాట్లాడారు.
తెలంగాణ ప్రయోజనాల పట్ల కాంగ్రెస్, బీజేపీ నేతలకు సోయి లేదు. ప్రాజెక్టుల విషయంలో కేంద్రం కుట్రలను ఖండించాం. కేసీఆర్ కదిలిన తర్వాతే కేఆర్ఎంబీకి ప్రాజెక్టులు అప్పగించబోమని అసెంబ్లీలో తీర్మానం చేశారు. గోదావరి జలాల తరలింపుపై గతంలో కేసీఆర్ గళమెత్తారు. ఇప్పుడు గోదావరి నీళ్లు దోచుకుపోతుంటే రేవంత్ రెడ్డి స్పందించలేదు. సింగరేణిని ప్రయివేటీకరణ కుట్రకు కేంద్ర, రాష్ట్ర ప్రభుత్వాలు కుట్రలు చేస్తున్నాయి. ఇప్పుడు సింగరేణిని కాపాడుకోవడం మనందరి బాధ్యత. రాష్ట్రానికి కేసీఆరే శ్రీరామరక్ష అని మళ్లీ నిరూపితమవుతోంది. బొగ్గు గనుల అంశంలో ప్రశ్నిస్తే ఎదురుదాడి చేస్తున్నారు. బొగ్గు గనుల వేలం వద్దని గతంలో రేవంత్ రెడ్డి ఇదే ప్రధాని నరేంద్ర మోదీకి లేఖ రాశారు. ఇవాళ మాత్రం డిప్యూటీ సీఎం భట్టి విక్రమార్క వేలంలో పాల్గొన్నారు అని మండిపడ్డారు.
కిషన్ రెడ్డి పదవి తీసుకొని హైదరాబాద్లో దిగిన మొదటి రోజే తెలంగాణ రాష్ట్ర ప్రజలకి ద్రోహం చేసే పని చేశాడని జగదీశ్ రెడ్డి ధ్వజమెత్తారు. కొంత మందికి పదవులు వస్తే అదృష్టం వచ్చింది అనుకుంటాం కానీ కిషన్ రెడ్డి దురదృష్టవంతుడు. కిషన్ రెడ్డికి ఎన్ని పదువులు వచ్చినా ఈ రాష్ట్ర ప్రజలకు ఉపయోగపడే పని ఒక్కటి కూడా చెయ్యలేదు.. గత ఐదేండ్లలో కిషన్ రెడ్డి చేసింది ఏమైన ఉందంటే అక్కడ ఎక్కడో రైల్వే స్టేషన్లో పాత లిఫ్టును బాగు చేసి ప్రారంభించడం. ఈసారి క్యాబినెట్ పదవి తీసుకొని హైదరాబాద్ వచ్చిన మొదటి రోజే మన తెలంగాణను ద్రోహం చేసే పని, మన సింగరేణిని నట్టేట ముంచి దానికి ఉరి పెట్టే పని చేశాడు అని బీఆర్ఎస్ ఎమ్మెల్యే జగదీష్ రెడ్డి ఆగ్రహం వ్యక్తం చేశారు.