MLA Gadari Kishore | సూర్యాటపే : బీఆర్ఎస్ ఎమ్మెల్సీ కవిత( MLC Kavitha )పై అనుచిత వ్యాఖ్యలు చేసిన బండి సంజయ్( Bandi Sanjay )పై బీఆర్ఎస్ ఎమ్మెల్యే గాదరి కిషోర్ మండిపడ్డారు. మహిళల గురించి మాట్లాడేటప్పుడు నోరు అదుపులోకి పెట్టుకోని మాట్లాడాలని బండి సంజయ్ను కిషోర్ హెచ్చరించారు. తెలంగాణ మహిళా సమాజాన్ని కించపరిస్తే మహిళలు బండి సంజయ్ బట్టలూడదీసి కొడతారని హెచ్చరించారు.
మహిళలను కించపరిచే బండి సంజయ్ నోరును ఫినాయిల్తో కడగాలన్నారు. మహిళలను గౌరవించలేని అధ్యక్షుడున్న దౌర్భాగ్యపు పరిస్థితి బీజేపీకి ఏర్పడిందన్నారు. ఈడీ ఏం చేసేది బీజేపీ నేతలకు ముందే ఎలా తెలుస్తుంది? అని ప్రశ్నించారు. బీజేపీ చేతిలో దర్యాప్తు సంస్థలు కీలు బొమ్మలనడానికి బీజేపీ నేతల ముందస్తు వ్యాఖ్యలే నిదర్శనం అని పేర్కొన్నారు.
బీజేపీ చేస్తున్న అన్యాయాలను ఎదురిస్తే కేసులు పెడతారా? ఎన్ని కేసులు పెట్టినా ఉద్యమ నేపథ్యం నుండి వచ్చిన తాము భయపడం. బీజేపీతో ఏదైనా తేల్చుకోవడానికి బీఆర్ఎస్ సిద్ధంగా ఉంది అని ఎమ్మెల్యే గాదరి కిషోర్ స్పష్టం చేశారు.