MLC Jeevan Reddy | కరీంనగర్, జూన్ 24 (నమస్తే తెలంగాణ ప్రతినిధి/జగిత్యాల నమస్తే తెలంగాణ): జగిత్యాల బీఆర్ఎస్ ఎమ్మెల్యే డాక్టర్ సంజయ్కుమార్కు సీఎం రేవంత్రెడ్డి స్వయంగా కండువా కప్పి పార్టీలో చేర్చుకున్న వ్యవహారం కాంగ్రెస్ పార్టీలో చిచ్చు రేపింది. సీనియర్ నాయకుడైన జీవన్రెడ్డిని వదిలించుకోవడంలో భాగంగానే సీఎం ఈ వ్యూహాన్ని అమలు చేశారన్న విమర్శలు సొంత పార్టీ నుంచే వినిపిస్తున్నాయి. సీనియర్లను పక్కన పెట్టడమే లక్ష్యంగా పావులు కదుపుతున్నారని ఇప్పటికే విమర్శలు ఎదుర్కొంటున్న రేవంత్రెడ్డి చేతలకు జీవన్రెడ్డి ఇలాకాలో జరిగిన తాజా పరిణామం కూడా ఒక ఉదాహరణే అన్న అభిప్రాయాలను సీనియర్లు వ్యక్తం చేస్తున్నారు. ఈ వ్యవహారంలో ఉమ్మడి జిల్లాకు చెందిన పలువురు ప్రజాప్రతినిధులు సైతం పావులుగా మారగా, జీవన్రెడ్డి సమిధగా మారారు. ఊహించని ఈ పరిణామంపై జీవన్రెడ్డి మండిపడ్డారు. సోమవారం ఉదయమే శ్రేణులతో మాట్లాడిన ఆయన ఎమ్మెల్సీ పదవికి రాజీనామా చేస్తామని ప్రకటించారు.
పరిస్థితి మరింత దిగజారే పరిస్థితి కనిపించడంతో రంగంలోకి దిగిన అధిష్ఠానం దిద్దుబాటు చర్యలు చేపట్టింది. జీవన్రెడ్డిని చల్లబరిచేందుకు పొద్దంతా చర్చలు జరిపింది. ఇద్దరు విప్లను పంపి చర్చలు జరిపినప్పటికీ ఆయన ససేమిరా అనడంతో మంత్రులు మాట్లాడి నచ్చజెప్పే ప్రయత్నం చేశారు. జీవన్రెడ్డి వారిపైనా ఆగ్రహం వ్యక్తంచేశారు. జీవన్రెడ్డికి జగిత్యాలపై మంచి పట్టుంది. ఈ తరుణంలో సంజయ్కుమార్ను ఎందుకు చేర్చుకోవాల్సి వచ్చిందన్న దానిపై పార్టీ శ్రేణుల్లో అనుమానాలు వ్యక్తమవుతున్నాయి. జీవన్రెడ్డిని వదిలించుకునే దిశగా అధిష్ఠానం అడుగులు వేసిందా? ఈ వ్యూహంలో ఉమ్మడి కరీంనగర్ జిల్లా నాయకత్వాన్ని పావులుగా వినియోగించిందా? జీవన్రెడ్డి, సీఎం ఒకే సామాజికవర్గానికి చెందిన వారు కాబట్టి భవిష్యత్తులో తన పదవికి ముప్పు ఉంటుందన్న కుట్రలో భాగంగా సంజయ్ను చేర్చుకున్నా రా?అన్న అనుమానాలు వ్యక్తమవుతున్నాయి.
తనతోపాటు పార్టీ శ్రేణులకు ఎలాంటి సమాచారం ఇవ్వకుండానే డాక్టర్ సంజయ్ను పార్టీలో చేర్చుకోవడపై జీవన్రెడ్డి భగ్గుమన్నారు. విషయం తెలుసుకున్న పార్టీ శ్రేణులు, అభిమానులు సోమవారం ఉదయమే పెద్ద సంఖ్యలో జీవన్రెడ్డిని ఆయన ఇంటివద్ద కలిసి ఆందోళన వ్యక్తంచేశారు. సీఎం రేవంత్రెడ్డి తీరుపై ఆగ్రహం వ్యక్తంచేశారు. తనకు మాటమాత్రమైనా చెప్పకుండా, తన అనుభవానికి కనీస విలువ ఇవ్వకుండా సీఎం వ్యవహరించారంటూ జీవన్రెడ్డి బాహాటంగానే తన అసంతృప్తిని వ్యక్తంచేశారు. ఎమ్మెల్సీ పదవికి రాజీనామా చేస్తానని ప్రకటించడంతో వాతావరణం ఒక్కసారిగా వేడెక్కింది. పార్టీని వీడే విషయమై మీడియాతో మాట్లాడతానని చెప్పడంతో మీడియా ప్రతినిధులు అక్కడికి చేరుకున్నారు. ఈ నేపథ్యంలో అధిష్ఠానం బుజ్జగింపులు మొదలుపెట్టింది. పలువురు మంత్రులు జీవన్రెడ్డికి ఫోన్ చేసి మాట్లాడినా ఆయన వినకపోవడంతో జిల్లాకు చెందిన విప్లు అడ్లూరి లక్ష్మణ్కుమార్, ఆది శ్రీనివాస్ ఆయన ఇంటికి వెళ్లి సంప్రదింపులు జరిపారు.
ఈ సందర్భంగా జీవన్రెడ్డి వారిపై తీవ్ర ఆగ్రహం వ్యక్తం చేసినట్టు తెలిసింది. పార్టీ కోసం అంకితభావంతో పనిచేసిన తనకు కనీసం సమాచారం ఇవ్వకుండా ఎమ్మెల్యేను చేర్చుకోవడం ఏమిటని ప్రశ్నించినట్టు సమాచారం. రేవంత్రెడ్డి తనపై ఎందుకు కక్షగట్టారో చెప్పాలని నిలదీసినట్టు తెలిసింది. తనకు సమాచారం ఇవ్వకపోవడానికి గల కారణం చెప్పాకే చర్చలు జరుపుదామని చెప్పినట్టు సమాచారం. కాంగ్రెస్ నేతలు బుజ్జగింపులు చేస్తున్నప్పటికీ మరోవైపు, జీవన్రెడ్డి మాత్రం భవిష్యత్తు రాజకీయ కార్యాచరణపై పార్టీ శ్రేణులతో మాట్లాడుతున్నట్టు సమాచారం.
అసెంబ్లీ, లోక్సభ ఎన్నికల్లో జీవన్రెడ్డి ఓటమి పాలయ్యాక ఆయనపై విఫలనేతగా ముద్రవేయడం ముందస్తు వ్యూహంలో భాగమేనన్న విమర్శలు వినిపిస్తున్నాయి. ఇప్పుడాయన స్థానంలో డాక్టర్ సంజయ్ను తీసుకున్నట్టుగా చేసి, జీవన్రెడ్డిని వదిలించుకునే కుట్రకు తెరలేపారన్న ఆరోపణలు తెరపైకి వచ్చాయి. పార్టీయే సర్వస్వం అని భావించి పనిచేస్తున్న జీవన్రెడ్డి బయటి నుంచి ఎన్ని అవకాశాలు వచ్చినా పార్టీని వీడలేదు. ఆయనకు కనీసం సమాచారం ఇవ్వకుండా జరుగుతున్న పరిణామాలపై జీవన్రెడ్డి మద్దతుదారులు మండిపడుతున్నారు.
ఈ వ్యవహారంపై తాడోపేడో తేల్చుకోవాలని, అవసరమైతే గాంధీభవన్ ముట్టడిద్దామని పార్టీ శ్రేణులకు జీవన్రెడ్డి చెప్పినట్టు తెలిసింది. సీఎం పదవికి మాత్రమే ప్రాధాన్యం ఇచ్చిన రేవంత్రెడ్డి, విలువలు, పార్టీ కట్టుబాట్లకు తిలోదకాలు ఇచ్చి పచ్చి అవకాశవాద రాజకీయం చేస్తున్నారని చెప్పడానికి జీవన్రెడ్డి వ్యవహారమే నిదర్శనమన్న విమర్శలు వ్యక్తమవుతున్నాయి. పార్టీ కష్టకాలంలో ఉన్నప్పుడు 40 మంది స భ్యుల శాసనమండలిలో 39 మంది సభ్యులు బీఆర్ఎస్ వాళ్లు ఉన్నా, ఒకే ఒక్క కాంగ్రెస్ ఎమ్మెల్సీగా ఉన్న జీవన్రెడ్డి పోరాటం చేశారని గుర్తుచేస్తున్నారు. అలాంటి నాయకుడు కష్టకాలంలో ఉన్నప్పుడు ఆయనను కాదని, ఆయన ప్రత్యర్థిని పార్టీలోకి తీసుకోవడం చూస్తుంటే జీవన్రెడ్డి సీనియార్టీకి విలువ ఇవ్వలేదన్నది అర్థమవుతున్నదని చెప్తున్నారు.
40 ఏండ్ల సుదీర్ఘ రాజకీయ అనుభవం కలిగిన జీవన్రెడ్డి ఆరుసార్లు ఎమ్మెల్యేగా ఎన్నికయ్యారు. మూడుసార్లు మంత్రిగా పనిచేశారు. ఒకసారి ఎమ్మెల్సీగా ఎన్నికయ్యారు. జువ్వాడి చొక్కారావు, ఎమ్మెస్సార్, శ్రీపాదరావు లాంటి వారి తర్వాత అత్యంత సీనియర్గా గుర్తింపు పొందారు. కాంగ్రెస్ పార్టీలో సోనియాగాంధీ నుంచి క్షేత్రస్థాయి వరకు ఆయనకు పరిచయాలున్నాయి. అలాంటి జీవన్రెడ్డికి మాటమాత్రమైనా చెప్పకుండా మరో పార్టీ ఎమ్మెల్యేను చేర్చుకోవడం రేవంత్రెడ్డి వ్యూహంలో భాగమేనని చెప్తున్నారు. నిజానికి పార్లమెంట్ ఎన్నికలకు ముందే డాక్టర్ సంజయ్కుమార్ ముఖ్యమంత్రిని కలిశారు. అప్పట్లోనే కాంగ్రెస్లో దీనిపై అనుమానాలు వ్యక్తమయ్యాయి. నియోజకవర్గ అభివృద్ధి నిధుల కోసమే సీఎంను కలిశానంటూ ఆయన వివరణ ఇవ్వడంతో అప్పట్లో ఆ విషయం సద్దుమణిగింది. తాజా పరిణామాలు చూస్తుంటే మాత్రం ఇది అకస్మాత్తుగా జరిగిన చేరిక కాదని, వ్యూహాత్మకంగానే జరిగిందని అర్థమవుతున్నది.