హైదరాబాద్, జూలై 5 (నమస్తే తెలంగాణ): తెలంగాణ శాసనమండలి రద్దయ్యే ప్రమాదం పొంచి ఉన్నదని బీఆర్ఎస్ నేత, మాజీ ఎంపీ బోయినపల్లి వినోద్కుమార్ ఆందోళన వ్యక్తంచేశారు. తెలంగాణ భవన్లో శుక్రవారం ఆయన మీడియాతో మాట్లాడుతూ.. రాజ్యాంగం ప్రకారం అసెంబ్లీలోని ఎమ్మెల్యేల సంఖ్యలో మూడోవంతు సభ్యులు శాసనమండలిలో ఉండాలని తెలిపారు. అలాగే రాజ్యాంగంలోని ఆర్టికల్ 171 ప్రకారం శాసనమండలిలో కనీసం సీట్లు 40 ఉండాలని చెప్పారు.
తెలంగాణ శాసనసభలో ఇంతకుముందు నామినేటెడ్ ఆంగ్లో ఇండియన్ ఎమ్మెల్యేలను కలుపుకొని మొత్తం 120 మంది ఉండేవారు. వీరిలో మూడోవంతు 40 మందితో శాసనమండలిని కొనసాగిస్తున్నారు. కాగా కేంద్రం ప్రభుత్వం గత లోక్సభ సమయంలో రాజ్యాంగ సవరణ చేసి అసెంబ్లీలో ఆంగ్లో ఇండియన్ ఎమ్మెల్యేను నామినెట్ చేసే విధానాన్ని తొలగించిందని తెలిపారు. దీంతో తెలంగాణ అసెంబ్లీలో శాసనసభ్యుల సంఖ్య 119కి తగ్గిందన్నారు.
ఎమ్మెల్యేల్లో మూడో వంతు మాత్రమే కౌన్సిల్ సభ్యులు ఉండాలన్న నిబంధనల ప్రకారం మండలిలో సభ్యుల సంఖ్య 39కి పడిపోతుందని వివరించారు. మండలిలో కనీసం 40 మంది సభ్యులు ఉండాలనే నిబంధనను ఉల్లఘించినట్టు అవుతుందని అన్నారు. దీనిపై ఎవరైనా కోర్టు వెళితే వెంటనే మండలి రద్దు అయ్యే అవకాశం ఉందని హెచ్చరించారు.
అసెంబ్లీ సీట్ల సంఖ్యను పెంచాలి
తెలంగాణ శాసనమండలి కొనసాగాలంటే అసెంబ్లీ స్థానాల సంఖ్య పెరగాలని వినోద్కుమార్ సూచించారు. రాష్ట్ర విభజన చట్టం సెక్షన్ 26 ప్రకారం తెలంగాణలో 153కు, ఏపీలో 225కు అసెంబ్లీ సీట్లను పెంచాల్సి ఉందని చెప్పారు. హైదరాబాద్లో శనివారం రెండు తెలుగు రాష్ర్టాల ముఖ్యమంత్రులు రేవంత్రెడ్డి, చంద్రబాబు నాయుడు భేటీ అవుతున్న నేపథ్యంలో ఈ అంశంపై దృష్టి సారించాలని సూచించారు.
కేంద్రంలో చంద్రబాబు కీలకంగా ఉన్న నేపథ్యంలో రెండు రాష్ర్టాల అసెంబ్లీల్లో సీట్ల సంఖ్య పెంపునకు కృషి చేయాలని పేర్కొన్నారు. అసెంబ్లీ సీట్లను పునర్వ్యవస్థీకరించాలని గతంలో కేంద్రాన్ని కోరినా స్పందించలేదని, కుంటిసాకులు చెప్పిందని గుర్తుచేశారు. కానీ జమ్ముకశ్మీర్లో అసెంబ్లీ సీట్లను పెంచుకున్నారని, కేంద్రానికి ఇష్టం ఉంటే సీట్లను పెంచుకుంటున్నారని తెలిపారు.
విభజన చట్టాన్ని అమలు చేసేందుకు సీఎం రేవంత్రెడ్డి చంద్రబాబుతో మాట్లాడాలని, తద్వారా తెలంగాణ మండలిని కొనసాగించేందుకు కృషి చేయాలని పేర్కొన్నారు. ఇరువురు రాష్ట్రాల సీఎంల సమావేశంలో తెలంగాణ ప్రయోజనాల లక్ష్యంగా పనిచేయాలని అన్నారు. రాష్ట్ర ప్రయోజనాల విషయంలో రాజీపడొద్దని సూచించారు. ఢిల్లీలోని ఏపీ భవన్ విభజన విషయంలో గత చరిత్రను పరిశీలించాలని సూచించారు.