అధికారం, పదవులు లేకుంటే బతకలేమా.. ఈ వయసులో పార్టీ మారడం భావ్యమా అని పోచారం శ్రీనివాసరెడ్డిని మాజీ మంత్రి, ఎమ్మెల్యే వేముల ప్రశాంత్రెడ్డి ప్రశ్నించారు. పార్టీ క్లిష్ట పరిస్థితుల్లో ఉన్నప్పుడు పోచారం శ్రీనివాస్రెడ్డి కేసీఆర్కు వెన్నుపోటు పొడవటం బాధాకరమని అన్నారు. దీనిపై బాన్సువాడ ప్రజలే ఆలోచించాలని ఆయన విడుదల చేసిన ప్రకటనలో విజ్ఞప్తి చేశారు.
పోచారం శ్రీనివాస్రెడ్డికి కేసీఆర్ ఏం తక్కువ చేశారని, ఎప్పుడూ లక్ష్మీపుత్రుడనీ సంబోధిస్తూ అధిక ప్రాధాన్యత ఇచ్చిన విషయాన్ని ప్రశాంత్రెడ్డి గుర్తుచేశారు. పోచారం శ్రీనివాస్రెడ్డిని తమకు ఆదర్శంగా చూపిస్తూ కేసీఆర్ వారి గురించి గొప్పగా చెప్పేవారన్నారు. వ్యవసాయ మంత్రిగా, స్పీకర్గా సమున్నతస్థానం కల్పించారని, బాన్సువాడ నియోజకవర్గ అభివృద్ధికి పోచారం అడిగినన్ని నిధులు ఇచ్చిన సందర్భాలను ఆయన ఉదహరించారు. సీఎం డెవలప్మెంట్ నిధుల నుంచి అత్యధికంగా తీసుకున్నది పోచారమేనన్నారు. అలాగే తాను ఆర్అండ్బీ మంత్రిగా తన నియోజకవర్గాని కంటే బాన్సువాడకు అడిగినన్ని డబుల్ బెడ్రూం ఇండ్లు ఇచ్చానని పేర్కొన్నారు. ప్రాణం పోయే వరకు కేసీఆర్ వెంటే ఉంటానని బహిరంగ సభ సాక్షిగా చెప్పిన పోచారం, పార్టీ కష్ట సమయంలో కేసీఆర్ వదిలి వెళ్లి ఇష్టంగా కొలిచే ఆ తెలంగాణ తిరుమల శ్రీనివాసుడికి ఏం సమాధానం చెప్తారు అని ప్రశ్నించారు.