RS Praveen Kumar | నల్లగొండ : వరంగల్ – ఖమ్మం – నల్లగొండ పట్టభద్రుల కాంగ్రెస్ ఎమ్మెల్సీ అభ్యర్థి తీన్మార్ మల్లన్నపై బీఆర్ఎస్ నాయకుడు ఆర్ఎస్ ప్రవీణ్ కుమార్ నిప్పులు చెరిగారు. కాంగ్రెస్ అభ్యర్థిని మండలికి ప్రశ్నించడం మానేసి.. తడిబట్టతో గొంతులు కోసే ప్రమాదం ఉంటదని ఆర్ఎస్పీ హెచ్చరించారు. నల్లగొండ జిల్లా కేంద్రంలో నిర్వహించిన ఖమ్మం – వరంగల్ – నల్లగొండ పట్టభద్రుల ఎమ్మెల్సీ ఎన్నికల ప్రచార సభలో బీఆర్ఎస్ అభ్యర్థి రాకేశ్ రెడ్డికి మద్దతుగా ఆర్ఎస్ ప్రవీణ్ కుమార్ పాల్గొని ప్రసంగించారు.
బీఆర్ఎస్ అభ్యర్థి రాకేశ్ రెడ్డి ఒక మేధావి.. ప్రగతిశీల భావాలున్న నాయకుడు. ఆయనను మండలిలోకి పంపించాలి. ఇది పార్టీ సభ కాదు.. ఇది ఒక మేధావుల సభ.. మేదోమధనం సభగానే చూస్తున్నాను. మేధావులు పట్టభద్రులు. ఈ రోజు దేశ ఆర్థిక వ్యవస్థలో అడుగు పెట్టిన వ్యక్తులు మీరు. మీ విలువైన ఓటుతో దేశ, రాష్ట్ర రాజకీయాలను మలుపు తిప్పే సత్తా ఉన్న వ్యక్తులు మీరు. కాబట్టి మేధావి అయిన రాకేశ్ రెడ్డికి ఓటు వేయాలని ఆర్ఎస్పీ కోరారు.
రాకేశ్ రెడ్డి రైతు కుటుంబంలో పుట్టి బిట్స్ పిలానీలో.. ఇంజినీరింగ్ చదివారు. గోల్డ్ మెడల్ సాధించారు. అమెరికా పోయి అత్యున్నత ఉద్యోగం చేశారు. అక్కడికి వెళ్లిన వారంతా అక్కడే ఉండిపోవాలనుకుంటున్నారు. కానీ ఈ రోజు రాకేశ్ రెడ్డి ఏడేండ్లు అమెరికాలో పని చేసి మాతృభూమిపై ప్రేమతో 2013లో తెలంగాణకు వచ్చారు. నాటి నుంచి నేటి వరకు రాజకీయాల్లోనే ఉంటున్నారు. ఆయన ఎన్నో బుక్స్ రాశారు. ఇండియన్ ఎకనామీ మీద చక్కటి పుస్తకం రాశారు. ఎన్నో పత్రికలకు వ్యాసాలు రాసిన విశ్లేషకుడు ఆయన అని ఆర్ఎస్పీ పేర్కొన్నారు.
ప్రశ్నించే గొంతుక నేను అని కాంగ్రెస్ అభ్యర్థి ప్రచారం చేసుకుంటున్నారు. ఆయన గురించి రెండు మూడు విషయాలు చెప్పాలి. ఎన్నికల అఫిడవిట్లో పొందుపరిచిన వివరాల ప్రకారం ఆయనపై 56 కేసులు ఉన్నాయి. చంపుతానని బెదిరించడం, అమ్మాయిల ఫోటోలను మార్ఫింగ్ చేసి, వారి నంబర్లను ఫేస్బుక్, యూట్యూబ్లో పెట్టి ప్రచారం చేయడం వంటి సంస్కారం లేని పనులు చేశారు కాంగ్రెస్ అభ్యర్థి. మీడియాను అడ్డం పెట్టుకుని ఎంతో మంది జీవితాలను ఆగం చేసిండు. కాబట్టి మన భవిష్యత్ను నిర్ణయించే ఈ ఎన్నికల్లో ఒక మేధావికి ఓటు వేయాలని కోరుతున్నాను అని ఆర్ఎస్పీ తన ప్రసంగాన్ని ముగించారు.