హైదరాబాద్ సిటీబ్యూరో, జూలై 9 (నమస్తే తెలంగాణ): నిరుద్యోగుల ఉద్యమాన్ని అణచివేయాలని చూస్తే తిరుగుబాటు మరింత తీవ్రమవుతుందని బీఆర్ఎస్ నేత రాకేశ్రెడ్డి హెచ్చరించారు. లాఠీలు చూపెట్టి.. తుపాకీలు ఎక్కుపెట్టి.. ముళ్ల కంచెలు, బారికేడ్లను అడ్డుపెట్టి పోలీసులతో అణచేందుకు ప్రభుత్వం యత్నిస్తున్నదని ధ్వజమెత్తారు. ఇచ్చిన హామీలనే నిరుద్యోగులు అడుగుతున్నారని చెప్పారు.
నిరుద్యోగులకు సంఘీభావంగా మంగళవారం జరిగిన నిరసన కార్యక్రమంలో ఆయన పాల్గొన్నారు. సమైక్య పాలనలో కారు చీకట్లో సమైక్య ఉద్యమకారులను బంధించినట్లు.. ఈరోజు కూడా కారు చీకట్లో నిరుద్యోగులను బంధించడం అమానుషమని రాకేశ్రెడ్డి విమర్శించారు. సమైక్య పాలనలో రేవంత్ గురువైన చంద్రబాబునాయుడు ఆరోజు బషీర్బాగ్లో రైతుల రక్తాన్ని కండ్లచూశారని, ప్రాణాలను పొట్టన పెట్టుకున్నాడని ధ్వజమెత్తారు. ఈరోజు ఆయన శిష్యుడైన రేవంత్రెడ్డి నిరుద్యోగుల రక్తాన్ని కండ్ల చూస్తున్నాడని విమర్శించారు.