Peddi Sudarshan Reddy | హైదరాబాద్ : గత బీఆర్ఎస్ ప్రభుత్వంలో సీఎం కేసీఆర్ మంజూరు చేసిన 8 మెడికల్ కాలేజీలకు మెడికల్ కౌన్సిల్ ఆఫ్ ఇండియా అనుమతులు నిరాకరించిందని బీఆర్ఎస్ మాజీ ఎమ్మెల్యే పెద్ది సుదర్శన్ రెడ్డి తెలిపారు. గద్వాల, నారాయణపేట, ములుగు, వరంగల్, మెదక్, యాదాద్రి భువనగిరి, రంగారెడ్డి, మేడ్చల్ మల్కాజిగిరి జిల్లాల్లో మంజూరు చేసిన మెడికల్ కాలేజీల అనుమతులు నిరాకరించడం కాంగ్రెస్ ప్రభుత్వ వైఫల్యమే అని ఆయన స్పష్టం చేశారు. తెలంగాణ భవన్లో పెద్ది సుదర్శన్ రెడ్డి మీడియాతో మాట్లాడారు.
జిల్లాకో మెడికల్ కాలేజీ అందుబాటులో ఉండాలనే ఉద్దేశంతో గత ప్రభుత్వంలో సీఎం కేసీఆర్.. ప్రతి జిల్లాకు ఒక మెడికల్ కాలేజీని మంజూరు చేశారు. వైద్య విద్యను ప్రోత్సహించారు. పేద వర్గాలకు చెందిన బిడ్డలు ఇతర దేశాలకు వెళ్లి చదువుకునే బాధలను తప్పించాలనే ఉద్దేశంతో జిల్లాకో మెడికల్ కాలేజీని ఏర్పాటు చేశారు. 2022-23 ఏడాదిలో 8 మెడికల్ కాలేజీలు, 2023-24లో 9 మెడికల్ కాలేజీలు, 2024-25లో మరో 8 మెడికల్ కాలేజీలను మంజూరు చేసింది. మొదటి రెండేండ్లకు సంబంధించిన 17 కాలేజీలకు మెడికల్ కౌన్సిల్ అనుమతి ఇచ్చింది. అవి బ్రహ్మాండంగా నడుస్తున్నాయి. 2024-25లో మంజూరైన మెడికల్ కాలేజీలకు కేసీఆర్ ప్రభుత్వం ఆనాడే నిధులు మంజూరు చేయించారు. ప్రత్యేకమైన అనుమతులు తీసుకొచ్చారు. కానీ గత ఐదారు మాసాలుగా కాంగ్రెస్ ప్రభుత్వం నేషనల్ మెడికల్ కౌన్సిల్ వద్ద అనుమతులు తీసుకురావడంలో వైఫల్యం చెందింది అని పెద్ది సుదర్శన్ రెడ్డి తెలిపారు.
మా పార్టీ ఎమ్మెల్యేల మార్పిడి కోసం సీఎం రేవంత్ రెడ్డి అర్ధరాత్రి పని చేస్తున్నారు. కానీ 8 కాలేజీల అనుమతుల కోసం ఒక గంట కూడా సమీక్ష చేయలేదు. వైద్యాశాఖ మంత్రిత్వ శాఖతో పాటు ఆ శాఖ ఉన్నతాధికారులు కూడా సమీక్ష చేయలేదు. ఇవాళ కేంద్ర ప్రభుత్వ ఆధీనంలో ఉండే మెడికల్ కౌన్సిల్ 8 కాలేజీలకు అనుమతిల్వివ్వకుండా తిప్పి పంపింది. దీంతో మన తెలంగాణ ప్రభుత్వం పరువు పోయింది. ప్రతి జిల్లాకు నిర్మించుకున్న బీఆర్ఎస్ కార్యాలయాలు ఎలా కూల్చాలి అని కాంగ్రెస్ ప్రభుత్వం ప్రత్యేక సెల్ పెట్టి కార్యాచరణ చేపట్టింది. కానీ మెడికల్ కాలేజీల అనుమతి కోసం చర్యలు తీసుకోవడం లేదు. జిల్లా కార్యాలయాలు కూలగొట్టే కుట్రలకు సమయం ఇస్తుంది. కానీ ఇవాళ 8 కాలేజీలను పొగోట్టుకుంది. దీనికి సీఎం రేవంత్ సిగ్గుపడాలి. ఇద్దరు కేంద్ర మంత్రులు ఉన్నారు. కాంగ్రెస్, బీజేపీ నుంచి ఉన్న 16 మంది ఎంపీలు కూడా తల దించుకోవాల్సిన పరిస్థితి. తెలంగాణ అవసరాల కోసం 8 కాలేజీలు అందుబాటులోకి తేలేని పరిస్థితి ఏర్పడిందన్నారు.
తెలంగాణ ఏర్పాటు సమయంలో 850 మెడికల్ సీట్లు ఉంటే.. ఇవాళ 4 వేల పైచిలుకు ఎంబీబీఎస్ సీట్లు ఉన్నాయి. తక్కువ మెడికల్ సీట్లతో తెలంగాణ రాష్ట్రం చిట్టచివరలో ఉండే. ఇప్పుడు కేసీఆర్ కృషి వల్ల దేశంలోనే అగ్రభాగాన నిలిచింది మెడికల్ సీట్లలో. నర్సంపేట మెడికల్ కాలేజీ వచ్చిందని, పేద విద్యార్థులకు వైద్య విద్య అందుబాటులోకి వచ్చిందని సంతోషపడ్డాం. కానీ 8 మెడికల్ కాలేజీల అనుమతులు సాధించడంలో కాంగ్రెస్ ప్రభుత్వం వైఫల్యం చెందింది. ప్రభుత్వం మొద్దు నిద్ర పోతోంది. మీ ప్రభుత్వ విధానం, ప్రాధాన్యతలు ఏంటి..? వారం రోజుల్లో నీట్ కౌన్సెలింగ్ ప్రారంభం కానుంది. అంతలోనే నిరాకరించడం సరికాదు. కాంగ్రెస్ ప్రభుత్వ పనితీరుకు ఈ సంఘటన ఉదాహరణ. కేసీఆర్ ఆలోచనలు అంతం చేయాలని రేవంత్ కుట్ర చేస్తున్నారు. ఆ కుట్ర కోణంలోనే 8 మెడికల్ కాలేజీలు అనుమతులు కోల్పోయాయి. కేసీఆర్ పేరు గుర్తుండే ప్రాజెక్టులను నీరుగారుస్తున్నారు అని పెద్ది సుదర్శన్ రెడ్డి మండిపడ్డారు.
ఏడు నెలల గడిచింది.. కేవలం ఎమ్మెల్యేలు, ఎమ్మెల్సీల చేరిక మీదనే దృష్టి. ఒక్క అభివృద్ధి కార్యక్రమం కూడా జరగలేదు. తెలంగాణకు ఒక్క మెడికల్ కాలేజీ కూడా బీజేపీ ఇవ్వలేదు. తెలంగాణ నుంచి ఉన్న ఇద్దరు కేంద్ర మంత్రులు ఆత్మవిమర్శ చేసుకోవాలి. 8 మెడికల్ కాలేజీల్లో చేయాల్సిన రిక్రూట్మెంట్ విషయంలో రేవంత్ ప్రభుత్వం వైఫల్యం చెందింది. రిక్రూట్మెంట్ లేని కారణంగా నే అనుమతి నిరాకరిస్తున్నట్లు మెడికల్ కౌన్సిల్ మెయిల్ చేసింది. ఢిల్లీలో రేవంత్ వారం రోజులు ఉన్నారు కానీ వీటి అనుమతి కోసం సంప్రదించకపోవడం దురదృష్టం అని పెద్ది సుదర్శన్ రెడ్డి తెలిపారు.