హైదరాబాద్, జూన్ 18 (నమస్తే తెలంగాణ): ఆర్టీసీలో ఇంటలిజెంట్ టికెట్ ఇష్యూ మిషన్ (ఐటీఐఎం) కాంట్రాక్టును చలో మొబిలిటి సంస్థకు దక్కేవిధంగా ఆర్టీసీ అధికారులు వ్యవహరించారని బీఆర్ఎస్ నేత మన్నె క్రిషాంక్ ఆరోపించారు. మంగళవారం తెలంగాణ భవన్లో మీడియా సమావేశంలో క్రిశాంక్ మాట్లాడుతూ ఐటీఐఎంకు 2022లో టెండర్లు పిలిస్తే ఆరు కంపెనీలు వచ్చాయని, వాటిని 2023లో రద్దు చేశారని తెలిపారు.
తిరిగి 2024లో టెండర్లు పిలిస్తే మూడు కంపెనీలు వచ్చాయని, వాటిని ఫిబ్రవరి 29న రద్దు చేశారని చెప్పారు. సేవలు సంతృప్తిగాలేవని టెండరు రద్దు చేశాక అధికారులు మార్చి 4న అదే సంస్థ తో రేటుపై సంప్రదింపులు ఎలా చేశారని నిలదీశారు. ఆర్టీసీ అధికారులు చెబుతున్నట్టుగా మూడు రోజుల్లోనే వివిధ రాష్ట్రాల్లో అధికారుల బృందం పర్యటించిందా..? ఏ అధికారులు పర్యటించారో, వారు ఏం అధ్యయనం చేశారో చెప్పాలని డిమాండ్ చేశారు.
మూడు రోజుల్లోనే ఆ సంస్థకు టెండరు ఇవ్వాలనే నిర్ణయానికి ఎలా వచ్చారని ప్రశ్నించారు. ఇందులో రవా ణా శాఖ మంత్రి పొన్నం ప్రభాకర్ హస్తం ఉం దని ఆరోపించారు. ఈ విషయంపై మంత్రి పొన్నం ప్రభాకర్ స్పందించకపోవడంపై అనుమానాలు వ్యక్తంచేశారు.
కాంగ్రెస్ ప్రభుత్వం కమిషన్ల ప్రభుత్వంగా మారిందని మండిపడ్డారు. బీఆర్ఎస్ ప్రతినిధి బృందం బస్ భవన్కు రావడానికి సిద్ధంగా ఉందని, టెండర్లు, చలో మొబిలిటి సంస్థ సమర్పించిన పత్రాలు, అధికారుల బృందం పర్యటనకు సంబంధించిన డాక్యుమెంట్లను చూపించాలని అధికారులను కోరారు. టెండర్లలో పారదర్శకత పాటించడానికి డాక్యుమెంట్ల చూపించాలని, లేదంటే విచారణ కోసం తాము కోర్టు వెళ్తామని చెప్పారు.