Koppula Eshwar | హైదరాబాద్ : నాణ్యమైన విద్యను అందిస్తున్న గురుకుల పాఠశాలలను రద్దు చేస్తే ఉద్యమిస్తాం అని సీఎం రేవంత్ రెడ్డిని మాజీ మంత్రి, బీఆర్ఎస్ సీనియర్ నేత కొప్పుల ఈశ్వర్ హెచ్చరించారు. నిరుపేద వర్గాలకు చెందిన ఎంతో మంది విద్యార్థులు గురుకులాల్లో చదువుకుని, ఉన్నతస్థాయికి ఎదుగుతున్నారని పేర్కొన్నారు. అలాంటి గొప్ప గురుకులాలను నిర్వీర్యం చేయొద్దని ఈశ్వర్ కోరారు. తెలంగాణ భవన్లో కొప్పుల ఈశ్వర్ మీడియాతో మాట్లాడారు.
గతంలో తాను ఐదేండ్ల పాటు ఎస్సీ వెల్ఫేర్ మంత్రిగా పని చేశాను. చాలా ఏండ్ల పాటు ఎస్సీ, ఎస్టీ, మైనార్టీ వర్గాల పిల్లలు విద్యకు దూరంగా ఉన్నారు. చదువుకోవాలనే ఆసక్తి ఉన్నా డబ్బులు ఖర్చు పెట్టలేని పరిస్థితి ఉండే. అత్యంత నిరుపేదలకు నాణ్యమైన విద్యను అందించాలనే ఉద్దేశంతో గురుకుల పాఠశాలలను ఏర్పాటు చేశాం. ఫలితాలు కూడా అద్భుతంగా వచ్చాయని కొప్పుల ఈశ్వర్ తెలిపారు.
గురుకుల పాఠశాలల్లో చదువుకునేందుకు అవకాశాలు మెరుగుపడినప్పటికీ మానవ సంబంధాలు బలహీన పడుతున్నాయని ముఖ్యమంత్రి రేవంత్ రెడ్డి ఒక సభలో ప్రస్తావించారు. ఇది ఒక స్టడీ రిపోర్టులో వెల్లడైందని ఆయన చెప్పారు. దీని అర్థం ఏంటి..? రద్దు చేయడమే కదా..? లక్షలాది మంది పిల్లలకు నాణ్యమైన విద్యను అందిస్తున్న గురుకుల పాఠశాలల్లో కోట్ల రూపాయాలు ఖర్చు పెట్టి వారి జీవితాలను నిలబెట్టాలనే గొప్ప ప్రయత్నం చేశాం. మన గురుకుల పాఠశాలలు దేశంలోనే ఎంతో పేరు సంపాదించాయి. గురుకులాలకు ఎన్నో అవార్డులు కూడా వరించాయి. ఇతర రాష్ట్రాల అధికారులు మన గురుకులలాను సందర్శించి, మెచ్చుకున్నారు. ఆయా రాష్ట్రాల ముఖ్యమంత్రులు కూడా నివేదికలు తెప్పించుకున్నారు. అయితే రేవంత్ పాలనలో గురుకులాల మీద నీలి నీడలు కమ్ముకున్నాయి. అంటే ముఖ్యమంత్రి రేవంత్ రెడ్డి ఈ గురుకుల పాఠశాలలను రద్దు చేస్తామని చెప్పకనే చెప్పినట్టు అని కొప్పుల ఈశ్వర్ పేర్కొన్నారు.
1976లో ఆనాడు ఉన్నటువంటి నాయకులు పీవీ నర్సింహారావు ఆలోచనా మేరకు గురుకులాలు ఏర్పాటు చేశారు. 2014 నాటికి తెలంగాణలో 298 గురుకుల పాఠశాలలు ఉన్నాయి. అరకొర సౌకర్యాలతో ఆ గురుకులాలు ఉండేవి. తెలంగాణ రాష్ట్రం ఏర్పడిన తర్వాత నాటి సీఎం కేసీఆర్ గురుకులాల వల్ల నాణ్యమైన విద్యను అందించాలనే ఉద్దేశంతో గురుకులాల సంఖ్యను విపరీతంగా పెంచారు. ఎస్సీలకు 134 ఉంటే 238కి పెంచారు. బీసీలకు 19 ఉండే.. 261కి పెంచాం. మైనార్టీలకు 12 ఉండే 204కు పెంచాం. ఎస్టీ వర్గాల కోసం 96 ఉండే.. 261కు పెంచి లక్షలాది మంది విద్యార్థులకు నాణ్యమైన విద్యను అందించాం. మొత్తంగా అన్ని వర్గాలకు 298 ఉండే. వాటికి 619 కలిపి 917 గురుకుల విద్యాలయాలను ఏర్పాటు చేశామని ఈశ్వర్ గుర్తు చేశారు.
గురుకులాల్లో చదువుకునే ఒక్కో విద్యార్థిపైన లక్షా 20 వేలు ఖర్చు చేసి ఉన్నత విద్యను అందించాం. 2014 నాటికి గురుకులాల్లో 3575 మంది టీచర్లు ఉండే. 917 గుకులాలు ఏర్పాటు అయ్యాక 17 వేలకు పైగా టీచర్లను రిక్రూట్మెంట్ చేశాం. గ్రామీణ ప్రాంత విద్యార్థులకు మంచి విద్యను అందించే ప్రయత్నం జరిగింది అని ఈశ్వర్ తెలిపారు.