Sunke Ravi Shankar | తెలంగాణలో కాంగ్రెస్ పార్టీ అధికారంలోకి వచ్చిన తర్వాత 10 సంవత్సరాల క్రితం నాటి సమైక్య పాలన పరిస్థితులు కనిపిస్తున్నాయని చొప్పదండి మాజీ ఎమ్మెల్యే, బీఆర్ఎస్ నేత సుంకె రవిశంకర్ ఆందోళన వ్యక్తం చేశారు. గతేడాది జరిగిన అసెంబ్లీ ఎన్నికల్లో కాంగ్రెస్ అధికారంలోకి వస్తే ఏడాదిలోగా రెండు లక్షల ఉద్యోగాలు భర్తీ చేస్తాం, మెగా డీఎస్సీ నిర్వహిస్తామని ఇచ్చిన హామీలు ఇప్పటివరకు నెరవేర్చలేదని మంగళవారం మీడియాతో మాట్లాడుతూ అన్నారు. డీఎస్సీ అభ్యర్థులపై లాఠీ చార్జీలు చేస్తూ, అరెస్టులతో హింసిస్తున్నారని మండి పడ్డారు. డీఎస్సీ పరీక్ష నిర్వహణకు మూడు నెలల గడువు కావాలని అభ్యర్థులు కోరితే నిర్దాక్షిణ్యంగా వ్యవహరిస్తున్నారని ఆరోపించారు. విద్యార్థులపై లాఠీ చార్జీలు చేయమని మిమ్మల్ని గెలిపించారా? అని రవిశంకర్ ప్రశ్నించారు.
డీఎస్సీ అభ్యర్థుల కష్టాలు అంటూ గతంలో ఈ నాయకులే కదా మాట్లాడింది అని సుంకె రవి శంకర్ గుర్తు చేశారు. విద్యార్థుల సమస్యలపై కాంగ్రెస్ పార్టీ నేతలు తీన్మార్ మల్లన్న, ప్రొఫెసర్ కోదండరాం, బల్మూరి వెంకట్ ఎందుకు మాట్లాడటం లేదని ప్రశ్నించారు. అబద్ధపు హామీలతో అధికారంలోకి వచ్చిన తర్వాత మోసం చేసిన నయవంచక ప్రభుత్వం కాంగ్రెస్ పార్టీదని పేర్కొన్నారు. మంత్రులకు, ఎమ్మెల్యేలకు వినతి పత్రాలు ఇస్తామని విజ్ఞప్తి చేసినా పట్టించుకోవడం లేదని ధ్వజమెత్తారు.
బీఆర్ఎస్ ఎమ్మెల్యేలను కాంగ్రెస్ పార్టీలో చేర్చుకోవడంలో ఉన్న ఆసక్తి డీఎస్సీ అభ్యర్థులపై లేకుండా పోయిందని సుంకె రవిశంకర్ ఆరోపించారు. న్యాయం కావాలంటూ పోలీసుల కాళ్లపై పడ్డ కనికరించని పరిస్థితులు తెలంగాణలో నెలకొన్నాయని ఆందోళన వ్యక్తం చేశారు. పరీక్ష వెంట పరీక్ష రాస్తే ఇబ్బంది అవుతుందని డీఎస్సీ నిర్వహణ కోసం మూడు నెలల గడువు అడిగారని చెప్పారు. డీఎస్సీ నిర్వహణపై కాంగ్రెస్ మంత్రులు మొండి పట్టు పట్టారే తప్ప చలించిన పాపాన పోవడం లేదన్నారు. డీఎస్సీ నిర్వహణకు గడువు కావాలని అభ్యర్థులు అడుగుతున్నారే తప్ప మీ పదవులను అడగడం లేదని ఎద్దేవా చేశారు.
కాంగ్రెస్ పార్టీ అధికారంలోకి వచ్చిన ఆరు నెలల్లో 70 వేల ఉద్యోగాలను భర్తీ చేస్తామన్న రాష్ట్ర మంత్రి కోమటిరెడ్డి వెంకటరెడ్డి మాటలు ఏమయ్యాయని సుంకె రవిశంకర్ ప్రశ్నించారు. బీఆర్ఎస్ పాలనలో నోటిఫికేషన్ ఇచ్చి పరీక్షలు నిర్వహించి ఇచ్చిన ఉద్యోగాలకు అపాయింట్మెంట్లు ఇవ్వడం తప్ప గత ఏడు నెలల్లో కాంగ్రెస్ పార్టీ ప్రభుత్వం ఒక్క ఉద్యోగం కూడా ఇవ్వలేదన్నారు. వచ్చే డిసెంబర్ లోగా రెండు లక్షల ఉద్యోగాలు భర్తీ చేయాల్సిందేనని ఆయన డిమాండ్ చేశారు.
బీఆర్ఎస్ అధినేత కేసీఆర్ పాలనలో నిరుద్యోగులకు 2.30 లక్షల ఉద్యోగాలు ఇచ్చామని సుంకె రవి శంకర్ చెప్పారు. గురుకులాల్లో వేలాది మందికి ఉద్యోగ అవకాశాలు కల్పించాం అని తెలిపారు. యువతకు ఉద్యోగాలు ఇచ్చి మా సంకల్పాన్ని నెరవేర్చామని పేర్కొన్నారు. ఇప్పుడు కూడా డీఎస్సీ అభ్యర్థులకు అండగా ఉండి వారి కి న్యాయం జరిగే వరకూ బీఆర్ఎస్ పోరాడుతుందని స్పష్టం చేశారు.
కాంగ్రెస్ ప్రభుత్వం అధికారంలోకి వచ్చి ఏడు నెలలు గడిచినా ఇప్పటి వరకు విద్యాశాఖకు మంత్రిని నియమించని ఘనత సీఎం రేవంత్ రెడ్డిదని సుంకె రవిశంకర్ ఎద్దేవా చేశారు. పొరుగు రాష్ట్రం ఆంధ్రప్రదేశ్లో అధికారంలోకి వచ్చిన నీ గురువు చంద్రబాబు ఇచ్చిన హామీలను ఒక్కొక్కటిగా అమలు చేస్తున్నారని, నీ గురువును ఆదర్శంగా తీసుకోవాలని హితవు చెప్పారు.
కాంగ్రెస్ ప్రభుత్వం అమలు చేస్తున్న బస్సు పథకం తుస్సుమందని సుంకె రవిశంకర్ వ్యాఖ్యానించారు. రేవంత్ పాలనలో రైతులు సాగునీరు లేక హరిగోశ పడుతున్నారని ఆందోళన వ్యక్తం చేశారు. తెలంగాణలో కాంగ్రెస్ టైం పాస్ పాలన చేస్తుందన్నారు. అదేదో సినిమాలో లాగా ఒక్కరోజు ముఖ్యమంత్రి పాలనలా రేవంత్ రెడ్డి పాలన సాగుతుందన్నారు. ఇప్పటికైనా విమర్శలు మానుకొని ప్రజలకు ఏమి చేయాలో అది చేయి ఇచ్చిన మాట నిలబెట్టుకోవాలని సీఎం రేవంత్ రెడ్డిని కోరారు.
`నువ్వు విడుదల చేస్తానన్న జాబు క్యాలెండర్ ఏది. పథకాల అమలుకు కమిటీల పేరుతో దాటవేత ధోరణి అవలంబిస్తున్నారు. కాంగ్రెస్ పార్టీది ప్రజారంజక పాలన కాదు ప్రజా వంచక పాలన. విద్యార్థులకు అండగా బీఆర్ఎస్ ఉంది. అభ్యర్థులు ఆందోళన చెంది అఘాయిత్యాలకు పాల్పడొద్దు. డీఎస్సీ ని వాయిదా వేయకపోతే కాంగ్రెస్ ప్రభుత్వాన్ని విడిచిపెట్టి ప్రసక్తే లేదు. విద్యార్థుల డిమాండ్ మా డిమాండ్. కాంగ్రెస్ పాలనలో విద్యాశాఖ నిర్వీర్యమైంది. రేవంత్ రెడ్డి మంత్రిత్వ శాఖలను మీ దగ్గర పెట్టుకోకుండా ఇతరులకు కేటాయించు` అని సుంకె రవిశంకర్ వ్యాఖ్యానించారు.