హైదరాబాద్, జూన్ 21 (నమస్తే తెలంగాణ): ప్రజాస్వామ్య విలువలు, సమగ్రతను కాపాడేందుకు రాజీవ్గాంధీ తెచ్చిన పార్టీ ఫిరాయింపుల వ్యతిరేక చట్టాన్ని సీఎం రేవంత్రెడ్డి ఉల్లంఘించి ప్రజాస్వామ్య స్ఫూర్తిని దెబ్బతీస్తున్నారని బీఆర్ఎస్ సీనియర్ నేత దాసోజు శ్రవణ్ విమర్శించారు. పీసీసీ అధ్యక్షుడిగా ఉన్నప్పుడు రాజకీయ పార్టీ ఫిరాయింపులను తీవ్రంగా వ్యతిరేకించిన రేవంత్రెడ్డి, ఇప్పుడు అవే పద్ధతులను అనుసరిస్తున్నారని శుక్రవారం ఓ ప్రకటనలో పేర్కొన్నారు.
పోచారం శ్రీనివాస్రెడ్డిని కలవడానికి వెళ్లిన బీఆర్ఎస్ నాయకులు, విద్యార్థి విభాగం నేతలను పోలీసులు అరెస్టు చేయడం అక్రమమని బీఆర్ఎస్వీ రాష్ట్ర ఉపాధ్యక్షుడు పడాల సతీశ్ ఒక ప్రకటనలో తెలిపారు.