BRS | హైదరాబాద్, ఆగస్టు 21 (నమస్తే తెలంగాణ): పొత్తుల్లేని పోరు.. బీఆర్ఎస్ది అదే జోరు. తెలంగాణ రాష్ట్ర అవతరణ అనంతరం జరిగే మూడో అసెంబ్లీ ఎన్నికల్లో మూడోసారి కూడా బీఆర్ఎస్ ఒంటరిగానే పోటీ చేయబోతున్నది. రాష్ట్రంలోని 119 అసెంబ్లీ నియోజకవర్గాల్లో 115 స్థానాలకు అభ్యర్థులను బీఆర్ఎస్ అధినేత, సీఎం కేసీఆర్ ప్రకటించారు. నాలుగైదు రోజుల్లో మిగిలిన స్థానాల అభ్యర్థుల పేర్లూ ప్రకటిస్తామని తెలిపారు. 2014 ఎన్నికల్లో అభ్యర్థులను ప్రకటించే సమయంలో కేసీఆర్ చేసిన ప్రకటనను సోమవారం పునరుద్ఘాటించారు. ‘తెలంగాణ రాష్ట్ర సాధన కోసమే పుట్టిన ఉద్యమపార్టీగా బీఆర్ఎస్ తన లక్ష్యాన్ని ముద్దాడి గమ్యాన్ని చేరింది. ఇక నుంచి ఫక్తు రాజకీయ పార్టీగా వ్యవహరిస్తుంది’ అని సీఎం కేసీఆర్ ప్రకటించిన విషయం తెలిసిందే. 2014 ఎన్నికల్లో సింగిల్గా పోటీ చేసి 63 మంది ఎమ్మెల్యేలను గెలిచి తొలివిడత అధికారాన్ని సొంతం చేసుకున్నది. 2018 ఎన్నికల్లో 88 మంది ఎమ్మెల్యేలతో బీఆర్ఎస్ రెండోసారి అధికారాన్ని సొంతం చేసుకున్నది. మొదటిసారి కన్నా రెండోసారి 25 స్థానాలను అదనంగా గెలుచుకొన్నది.
గ్రామస్థాయి నుంచి రాష్ట్రస్థాయిదాకా ప్రతి ఎన్నికకు బీఆర్ఎస్ బలపడుతూ వచ్చింది. 2018 ఎన్నికల్లో 88 మంది ఎమ్మెల్యేలతో అజేయశక్తిగా నిలిచిన బీఆర్ఎస్లోకి ఇతర పార్టీల ఎమ్మెల్యేలు వచ్చి చేరారు. దీంతో ప్రస్తుతం బీఆర్ఎస్ ఎమ్మెల్యేల సంఖ్య 105కు చేరింది. మొత్తం 119 నియోజకవర్గాల్లో 105 స్థానాలు బీఆర్ఎస్ చేతిలో ఉన్నాయి. అలాగే గ్రామసర్పంచ్లు, ఎంపీటీసీలు, జడ్పీటీసీలు ఇలా అన్ని స్థాయిల్లో బీఆర్ఎస్ను తట్టుకునే శక్తి మరే పార్టీకి లేదు. రాష్ట్రవ్యాప్తంగా 4,470 మంది సర్పంచ్లుంటే అందులో బీఆర్ఎస్ సర్పంచ్లే 2,973 మంది ఉన్నారు. 538 మంది జడ్పీటీసీల్లో 449 మంది, 5,816 ఎంపీటీసీల్లో 3,571 మంది బీఆర్ఎస్వాళ్లే కావటం గమనార్హం. రాష్ట్రంలో 33 జిల్లాలుంటే 32 జిల్లా ప్రజాపరిషత్తులు, 120 మున్సిపాలిటీల్లో 112 మున్సిపాలిటీలు బీఆర్ఎస్వే. ఇలా గ్రామస్థాయి నుంచి రాష్ట్రస్థాయి దాకా అన్ని స్థాయిల్లో బీఆర్ఎస్ను ఏ పార్టీ ఎదుర్కోలేకపోయింది.
స్వరాష్ట్ర సాధనలో భాగంగా తెలంగాణకు జై కొట్టాలని బీఆర్ఎస్ 2004 సాధారణ ఎన్నికల్లో కాంగ్రెస్తో పొత్తుపెట్టుకున్నది. తెలంగాణకు బద్ధ శత్రువుగా ఉన్న టీడీపీని, సీపీఎం చేత జై తెలంగాణ అనిపించాలని 2009లో మహాకూటమిగా ఏర్పడి ఆ పార్టీలతో పొత్తుపెట్టుకున్నది. అప్పుడు పొత్తుల లక్ష్యం రాష్ట్ర సాధనలో భాగమైంది. రాష్ట్ర సాధన అనంతరం బీఆర్ఎస్ ఏ పార్టీతోనూ పొత్తు పెట్టుకోలేదు.
ప్రజాబలం, పార్టీ బలం రెండూ ఉన్న పార్టీగా బీఆర్ఎస్ మరోసారి తన ప్రత్యేకతను నిరూపించుకున్నది. రాష్ట్రస్థాయి నుంచి గ్రామస్థాయి దాకా అన్ని స్థాయిల్లో పార్టీ ప్రధాన కమిటీతోపాటు అనుబంధ కమిటీల దాకా విస్తృత నెట్వర్క్తో అజేయశక్తిగా ఉన్నది. 80 లక్షల సాధారణ సభ్యులు, క్రియాశీల సభ్యులతో పార్టీ నిర్మాణం బలంగా ఉన్న పార్టీగా బీఆర్ఎస్ రికార్డు నెలకొల్పింది.