Governor CP Radhakrishnan | హైదరాబాద్, జూలై 20 (నమస్తే తెలంగాణ): యాదగిరిగుట్ట శ్రీలక్ష్మీనర్సింహస్వామి ఆలయాన్ని అద్భుతంగా నిర్మించారని గవర్నర్ సీపీ రాధాకృష్ణన్ ప్రశంసించారు. ఆగమనశాస్త్రం ప్రకారం కట్టారంటూ అభినందించారు. గవర్నర్ను బీఆర్ఎస్ ఎమ్మెల్యేలు, ఎమ్మెల్సీలు శనివారం రాజ్భవన్లో కలిసిన సందర్భంగా వారి మధ్య ఆసక్తికర చర్చ జరిగింది. ఈ సందర్భంగా బీఆర్ఎస్ అధ్యక్షుడు, మాజీ ముఖ్యమంత్రి కేసీఆర్ ఆరోగ్య పరిస్థితి గురించి బీఆర్ఎస్ ప్రతినిధి బృందాన్ని గవర్నర్ ఆరా తీసినట్టు తెలిసింది. ‘కేసీఆర్ ఎలా ఉన్నారు? ఆయన ఆరోగ్యం ఎలా ఉన్నది? అడిగానని చెప్పండి’ అని అన్నట్టు సమాచారం.
తాను కూడా యాదగిరిగుట్టను సందర్శించానని, అద్భుతంగా ఉన్నదంటూ గవర్నర్ కొనియాడారని బీఆర్ఎస్ ప్రతినిధులు తెలిపారు. ‘కంగ్రాచ్యులెట్ హిమ్’ అంటూ కేసీఆర్ను ఉద్దేశించి అన్నారని తెలిసింది. కాంగ్రెస్ హామీలు, ప్రొటోకాల్ ఉల్లంఘనలు, ఎమ్మెల్యేల పార్టీ ఫిరాయింపులు, నిరుద్యోగుల పట్ల పోలీసులు వ్యవహరిస్తున్న తీరు తదితర అంశాలపై తాము చేసిన ఫిర్యాదుల విషయంలో గవర్నర్ స్పందన బాగున్నదంటూ బీఆర్ఎస్ ప్రతినిధి బృందం సంతృప్తి వ్యక్తంచేసింది. అధికారులను పిలిచి మాట్లాడుతామని హామీ ఇచ్చారని తెలిపారు.