భూపాలపల్లి, ఆగస్టు 29 (నమస్తే తెలంగాణ): రానున్న అసెంబ్లీ ఎన్నికల్లో బీఆర్ఎస్ అభ్యర్థి గండ్ర వెంకటరమణారెడ్డికే తాము ఓటేస్త్తామని జయశంకర్ భూపాలపల్లి జిల్లా భూపాలపల్లి నియోజకవర్గంలోని గొర్లవీడు గ్రామస్థులు తీర్మానం చేశారు. రాష్ట్ర దివ్యాంగుల కార్పొరేషన్ చైర్మన్ కేతిరెడ్డి వాసుదేవరెడ్డి స్వగ్రామమైన గొర్లవీడులో ఎమ్మెల్యే గండ్ర వెంకటరమణారెడ్డి మంగళవారం రూ.5.25 కోట్లతో పలు అభివృద్ధి పనులకు శంకుస్థాపన చేశారు. బీఆర్ఎస్ అభ్యర్థిగా పార్టీ అధినేత, ముఖ్యమంత్రి కే చంద్ర శేఖర్ రావు ప్రకటించిన తర్వాత మొదటిసారి గొర్లవీడుకు వచ్చిన గండ్రకు వాసుదేవరెడ్డి ఆధ్వర్యంలో గ్రామస్థులు, పార్టీ శ్రేణులు గజమాలతో స్వాగతం పలికారు. గ్రామంలో భారీ ర్యాలీ నిర్వహించారు. గ్రామంలో ఏర్పాటు చేసిన సభలో సర్పంచ్ తాటికంటి శంకరయ్య, 11 మంది వార్డు సభ్యులు గం డ్ర వెంకటరమణారెడ్డికే తాము ఓటేస్తామని చేసిన తీర్మానం కాపీని వాసుదేవరెడ్డితో కలిసి ఎమ్మెల్యే గండ్రకు అందజేశారు. ఈ కార్యక్రమానికి కళాకారుడు మిట్టపల్లి సురేందర్ హాజరై పాటలతో అలరించారు.