జవహర్నగర్, జూలై 17: జవహర్నగర్లో కుక్కల దాడిలో గాయపడిన బాలుడు విహాన్(16 నెలలు) చికిత్స పొందుతూ మృతి చెందాడు. సిద్దిపేట జిల్లా మిరుదొడ్డికి చెందిన భరత్కుమార్, భార్య లక్ష్మి, ఇద్దరు కూతుర్లు, కుమారుడితో కలిసి జవహర్నగర్లోని ఆదర్శ్నగర్లో అద్దెకు ఉంటున్నారు. భరత్కుమార్ స్థానికంగా కార్పెంటర్ పనులు చేస్తూ కుటుంబాన్ని పోషిస్తున్నాడు. మంగళవారం రాత్రి 7గంటలకు కుమార్తెకు జ్వరంగా ఉందని తల్లి లక్ష్మి మాత్రలు తీసుకురావడానికి మెడికల్ షాపునకు వెళ్లింది. కుమారుడు విహాన్ ఆడుకుంటూ గేటు బయటకు రాగా గుంపుగా వచ్చిన కుక్కలు ఒక్కసారిగా దాడి చేశాయి.
తలభాగాన్ని నోట్ల కరుచుకొని చెట్లపొదల్లోకి తీసుకెళ్లాయి. కుమారుడి కోసం కుటుంబసభ్యులు వెతకుతుండగా చెట్ల పొదల్లో బాలుడు కనిపించాడు. కుక్కలను తరిమివేసి బాలుడిని స్థానిక హాస్పిటల్కు తీసుకెళ్లారు. అక్కడి నుంచి మెరుగైన వైద్యం కోసం గాంధీ హాస్పిటల్కు తరలించగా చికిత్స పొందుతూ మంగళవారం రాత్రి చనిపోయాడు. ఇద్దరు కూతుర్ల తరువాత 11ఏండ్లకు పుట్టిన కుమారుడు విగతజీవిగా ఉండడంతో కుటుంబసభ్యుల రోదనలు మిన్నంటాయి. కుక్కల దాడిలో చనిపోయిన బాధిత కుటుంబానికి రూ.20 లక్షల నష్టపరిహారం చెల్లించాలని జవహర్నగర్ మున్సిపల్ కార్యాలయం ఎదుట ప్రజా సంఘాలు, రాజకీయ పార్టీల నాయకులు నిరసనకు దిగారు. బాలుడి కుటుంబాన్ని ఆదుకుంటామని కమిషనర్ తాజ్మోహన్రెడ్డి హామీ ఇచ్చారు. కలెక్టర్ దృష్టి తీసుకెళ్లి విహాన్ కుటుంబానికి న్యాయం చేస్తామని తెలిపారు. బాధిత కుటుంబసభ్యులను మేయర్, డిప్యూటీమేయర్, కార్పొరేటర్ నిహారికగౌడ్ పరామర్శించారు. విహాన్ అంత్యక్రియలను వారి స్వగ్రామం సిద్దిపేట జిల్లా మిరుదొడ్డిలో నిర్వహించారు.