జగిత్యాల రూరల్, జూన్ 5: ఆర్టీసీ బస్సు ఢీకొనడంతో బాలుడు మృతిచెందిన ఘటన జగిత్యాల జిల్లా రూరల్ మండలం మోరపల్లిలో బుధవారం సాయంత్రం జరిగింది. గ్రామానికి చెందిన మామిడి గంగారం-లతకు ఇద్దరు కొడుకులు. ఉపాధి కోసం గంగారాం సౌదీకి వెళ్లాడు. చిన్న కొడుకు మామిడి మానస్ (4) కర్బూజ కొనుక్కునేందుకు ఇంటి ముందుకొచ్చిన బండివద్దకు వెళ్తున్నాడు. ఈ సమయంలో జగిత్యాల నుంచి కొత్తపేటకు వెళ్తున్న ఆర్టీసీ బస్సు (అద్దె) ఢీకొన్నది. ఈ ఘటనలో బస్సు వెనక టైర్ కింద పడి మానస్ అక్కడికక్కడే మృతి చెందాడు. డ్రైవర్ నిర్లక్ష్యంగా బస్సు నడిపి తమ బాబును పొట్టబెట్టుకున్నాడని, తమకు న్యాయం చేయాలని బాధిత కుటుంబ సభ్యులు, బంధువులు రోడ్డుపై ధర్నా చేశారు. డ్రైవర్పై చట్టపరమైన చర్యలు తీసుకుంటామని హామీ ఇవ్వడంతో ధర్నా విరమించారు. మృతుడి తల్లి లత ఫిర్యాదు మేరకు పోలీసులు కేసు నమోదు చేసుకొన్నారు.