హైదరాబాద్, జూన్ 10 (నమస్తే తెలంగాణ): లోక్సభ ఎన్నికల్లో బీజేపీకి 400 సీట్లు వస్తే రిజర్వేషన్లను రద్దు చేస్తుందని, రాజ్యాంగాన్ని మార్చేస్తుందని మే 4న కొత్తగూడెంలో జరిగిన ఎన్నికల సభలో సీఎం రేవంత్రెడ్డి చేసిన వ్యాఖ్యలపై బీజేపీ చేసిన ప్రైవేట్ ఫిర్యాదును చట్ట ప్రకారం విచారించాలని హైకోర్టు కింది కోర్టును ఆదేశించింది. బీజేపీ ఇచ్చిన ఫిర్యాదులోని అంశాల జోలికి వెళ్లకుండా విచారణను జూలైకి వాయిదా వేయడాన్ని తప్పుపట్టింది.
ఫిర్యాదును పరిశీలించి చట్టప్రకారం తగిన ఉత్తర్వులు జారీ చేయాలని సూచించింది. సీఎం రేవంత్రెడ్డికి వ్యతిరేకంగా బీజేపీ చేసిన ప్రైవేటు ఫిర్యాదుపై విచారణ జరుపకుండా స్పెషల్ మేజిస్ట్రేట్ కోర్టు వాయిదా వేయడాన్ని సవాలు చేస్తూ బీజేపీ రాష్ట్ర ప్రధాన కార్యదర్శి కే వెంకటేశ్వర్లు హైకోర్టులో పిటిషన్ దాఖలు చేశారు. దీనిపై జస్టిస్ కే లక్ష్మణ్ సోమవారం విచారణ చేపట్టారు. చట్ట ప్రకారం విచారణ పూర్తి చేయకుండా కేసు వాయిదా వేసిన మేజిస్ట్రేట్ తీరును తప్పుపట్టారు. సత్వరమే చట్ట ప్రకారం విచారణ చేయాలని ఆదేశిస్తూ పిటిషన్పై విచారణ ముగిస్తున్నట్టు వెల్లడించారు.