భద్రాద్రి కొత్తగూడెం, ఏప్రిల్ 29 (నమస్తే తెలంగాణ): కొత్తగూడెంలో సోమవారం బీజేపీ నిర్వహించిన పార్లమెంట్ ఎన్నికల సభ తుస్సుమంది. ప్రకాశం స్టేడియంలో నిర్వహించిన సభకు బీజేపీ జాతీయ అధ్యక్షుడు జేపీ నడ్డా తొలిసారి వచ్చినప్పటికీ ప్రజలెవరూ రాలేదు. సభా ప్రాంగణమంతా ఖాళీ కుర్చీలతో దర్శనమిచ్చింది. ఖాళీ కుర్చీలను ఫొటోలు తీస్తున్న విలేకరుల కెమెరాలను కార్యకర్తలు లాక్కున్నారు. దీంతో సభలో విలేకరులు, కార్యకర్తలకు మధ్య వాగ్వాదం జరిగింది. పార్టీ నేతలు తాగునీరు ఏర్పాటుచేయకపోవడంతో ప్రజలు దాహంతో అల్లాడిపోయారు. కాగా సభలో జేపీ నడ్డా మాట్లాడుతూ.. కాంగ్రెస్ అంటేనే కుంభకోణాల పార్టీ అని విమర్శించారు. కాంగ్రెస్ పాలిత రాష్ర్టాల్లో నాయకులంతా ప్రజల సొమ్మును దోచుకుంటున్నారని దుయ్యబట్టారు. సీఎం రేవంత్రెడ్డి ఎన్ని కుట్రలు చేసినా తెలంగాణలో ఒక్క ఎంపీ సీటు కూడా గెలవలేరని చెప్పారు. రాష్ట్రంలో 17 సీట్లు బీజేపీ గెలుచుకుంటుందని ధీమా వ్యక్తం చేశారు. ఇక్కడ బీజేపీ నేతలు బండారు లక్షణ్, పొంగులేటి సుధాకర్రెడ్డి, రంగాకిరణ్, ఖమ్మం, మహబూబాబాద్ అభ్యర్థులు వినోద్రావు, సీతారాంనాయక్ పాల్గొన్నారు.
కాంగ్రెస్ ప్రధాని ఎవరు?
పార్లమెంట్ ఎన్నికల్లో కాంగ్రెస్ పార్టీకి ప్రధాని అభ్యర్థే లేరని, కాంగ్రెస్ నాయకులు సోనియా, రాహుల్గాంధీతో పాటు ఇండియా కూటమి నేతలు జార్ఖండ్ ముఖ్యమంత్రి హేమంత్సోరెన్, ఢిల్లీ ముఖ్యమంత్రి కేజ్రీవాల్, ఉప ముఖ్యమంత్రి మనీష్ సిసోడియాతో పాటు అందరూ అవినీతిపరులేనని బీజేపీ జాతీయ అధ్యక్షుడు జేపీ నడ్డా ఆరోపించారు. సోమవారం మహబూబాబాద్లోని ఎన్టీఆర్ స్టేడియంలో నిర్వహించిన బీజేపీ ఎన్నికల సభలో నడ్డా మాట్లాడారు. గిరిజన మ్యూజియం హైదరాబాద్లో, ఆదివాసీ, గిరిజనుల కోసం సమ్మక్క, సారలమ్మ పేర్ల మీద గిరిజన యూనివర్సిటీ, హైదరాబాద్ నుంచి భద్రాచలం వరకు జాతీయ రహదారి ఏర్పాటు చేశామని గుర్తు చేశారు. అవినీతి రహిత పాలన కోసం బీజేపీని గెలిపించాలని కోరారు. ఇక్కడ డాక్టర్ లక్ష్మణ్, గరికపాటి మోహన్రావు, ఎర్రబెల్లి ప్రదీప్రావు, గుజ్జుల ప్రేమేందర్రెడ్డి, ధర్మారావు, బీజేపీ అభ్యర్థి సీతారాంనాయక్ పాల్గొన్నారు.