హైదరాబాద్, జూలై 24(నమస్తే తెలంగాణ): రాష్ట్రంలోని కాంగ్రెస్ ప్రభుత్వం చేపడుతామన్న మూసీ రివర్ ఫ్రంట్ ప్రాజెక్టు అతిపెద్ద కుంభకోణమని బీజేపీ శాసనసభా పక్షనేత ఏలేటి మహేశ్వర్రెడ్డి విమర్శించారు. 1.50 లక్షల కోట్లతో ఈ ప్రాజక్టును చేపట్టి దీన్ని ఏటీఎంగా మార్చుకునేందుకు ప్రభుత్వం ప్రయత్నిస్తున్నదని ధ్వజమెత్తారు.
కేంద్ర బడ్జెట్లో తెలంగాణకు జరిగిన అన్యాయాన్ని నిరసిస్తూ రాష్ట్ర ప్రభుత్వం ప్రవేశపెట్టిన తీర్మానంపై చర్చ సందర్భంగా మహేశ్వర్రెడ్డి మాట్లాడారు. కేంద్ర బడ్జెట్ విషపూరితం అనడం బాధాకరమని వ్యాఖ్యానించారు. ఏపీ రాజధాని నిర్మాణం కోసం రూ.15,000 కోట్లు కేటాయించడంపై అక్కసుతో తీర్మానం ప్రవేశపెట్టడం సరికాదని పేర్కొన్నారు. సీఎం రేవంత్రెడ్డికి ఫెడరల్ స్ఫూర్తిపై అవగాహన లేదని తెలిపారు. అమృత్ పథకం కింద కేంద్రం ఇచ్చిన 3,500 కో ట్లను ఆస్థాన గుత్తేదార్లు పంచుకున్నారని, దీనిపై విచారణ జరిపించాలని డిమాండ్ చేశారు.