ప్రజాస్వామ్యాన్ని బీజేపీ అపహాస్యం చేస్తున్నదని, బీజేపీకి ప్రజాస్వామ్య విలువలు లేవని తెలంగాణ మంత్రి ఇంద్రకరణ్ రెడ్డి మండిపడ్డారు. టీఆర్ఎస్ ఎమ్మెల్యేలను కొనుగోలు చేయడానికి బీజేపీ ప్రయత్నించడంపై ఆగ్రహం వ్యక్తం చేసిన ఆయన.. టీఆర్ఎస్ను ఎలాగైనా దెబ్బకొట్టాలనే దురాలోచనతోనే బీజేపీ అడ్డదార్లు ఎంచుకుందన్నారు.
‘సిగ్గు ఎగ్గు లేకుండా ఎమ్మెల్యేలను కొనేందుకు విఫలయత్నం చేసింది. టీఆర్ఎస్ ఎమ్మెల్యేలు అమ్ముడుపోయే రకం కాదు. కేసీఅర్ ముందు మోదీ, అమిత్ షా ఆటలు సాగవు. మునుగొడులో బీజేపీని బొంద పెట్టాలి. బీజేపీకి రోజులు దగ్గర పడ్డాయి. ధనబలంతో ఇతర రాష్ట్రాల్లో ప్రభుత్వాలను కూల్చినట్లు టీఆర్ఎస్ ప్రభుత్వాన్ని కూల్చడం ఎవరి తరం కాదు. బీజేపీ ఢిల్లీ పీఠం బద్దలు కావడం ఖాయం. తెలంగాణ కోసం కాంగ్రెస్ ఉద్దండులతో ఢీకొట్టిన కేసీఆర్కు మోదీ, షాలు ఓ లెక్క కాదు’ అని స్పష్టం చేశారు.