బాసర, ఆగస్టు 25 : రాష్ట్రంలో బీజేపీ కుల, మత రాజకీయాలు చేసి ప్రజలను రెచ్చగోడుతున్నదని గిరిజన సంక్షేమ శాఖ మంత్రి సత్యవతి రాథోడ్ ఫైర్ అయ్యారు. గురువారం నిర్మల్ జిల్లా బాసరలోని శ్రీజ్ఞాన సరస్వతీ అమ్మవారిని దర్శించుకుని, తన మనవరాలు కియారాకు అక్షరశ్రీకార పూజలు నిర్వహించారు.
అనంతరం విలేకరులతో మాట్లాడారు. బండి సంజయ్.. పాదయాత్రకు బదులు మోకాళ్ల యాత్ర చేయాలి. కేంద్ర ప్రభుత్వంపై ఒత్తిడి తీసుకొచ్చి రాష్ర్టానికి రావాల్సిన వాటా తీసుకురావాలన్నారు. బీజేపీ నాయకులకు రానున్న ఎన్నికల్లో ప్రజలు బుద్ధి చెప్తారన్నారు. కేసీఆర్ కుటుంబ సభ్యులపై బీజేపీ నాయకుల ఆరోపణలు సబబు కాదని, ఇలాంటివి చేస్తే ఊరుకునేది లేదని హెచ్చరించారు.
బాసర ట్రిపుల్ ఐటీలోని విద్యార్థులు సంయమనం పాటించాలని, తమ ఉన్నతమైన భవిష్యత్ను పాడు చేసుకోవద్దని, వారికి ఒక అమ్మలా చెప్తున్నాని సూచించారు. ప్రభుత్వం విద్యార్థుల సమస్యలను ఒక్కొక్కటి పరిష్కరిస్తున్నదని, విద్యార్థి ఆత్మహత్యకు తన సంతాపాన్ని ప్రకటించారు.