కాంగ్రెస్ మునిగిపోయే పడవ
న్యూజెర్సీలో మంత్రి జగదీశ్రెడ్డి
హైదరాబాద్/సూర్యాపేట, మే 29 (నమస్తే తెలంగాణ)/సూర్యాపేట టౌన్: బీజేపీతో దేశానికి పెను ప్రమాదం పొంచి ఉన్నదని, ఆ పార్టీతో అప్రమత్తంగా ఉండాలని రాష్ట్ర విద్యుత్తు శాఖ మంత్రి జగదీశ్రెడ్డి హెచ్చరించారు. కాంగ్రెస్ పార్టీకి దేశంలో ఆదరణ లేదని పేర్కొన్న మంత్రి.. ఆ పార్టీని మునిగిపోయే పడవగా అభివర్ణించారు. అమెరికాలోని న్యూజెర్సీలో జరుగుతున్న తెలంగాణ అమెరికా తెలుగు సంఘం మహాసభలకు ఆయన ముఖ్యఅతిథిగా హాజరయ్యారు. మహాసభల చివరిరోజున టీఆర్ఎస్ ఎన్నారై విభాగం నిర్వహించిన మీట్ అండ్ గ్రీట్ కార్యక్రమంలో పాల్గొన్నారు. ఈ సందర్భంగా మంత్రి మాట్లాడుతూ.. ఆరు దశాబ్దాలుగా దేశాన్ని నాశనం చేసిన కాంగ్రెస్ పార్టీ ప్రస్తుతం సుప్తచేతనావస్థలోకి చేరుకున్నదన్నారు. గడిచిన ఎనిమిదేండ్లుగా మోదీ పాలనలో తెలంగాణకు పెద్దగా ఒనగూరిన ప్రయోజనమంటూ ఏదీ లేదని చెప్పారు. సీఎం కేసీఆర్ నాయకత్వాన్ని యావత్ భారత్ కోరుకుంటున్నదని, ఆయన ఎనిమిదేండ్లుగా అందించిన అభివృద్ధి నమూనానే అందుకు కారణమని తెలిపారు.
సంస్కృతికి తెలంగాణ పెట్టింది పేరు
ప్రపంచంలో ఎక్కడా ఏ జాతికీ లేని సాంస్కృతిక వారసత్వం ఒక్క తెలంగాణకు మాత్రమే ఉండటం మన అదృష్టమని మంత్రి జగదీశ్రెడ్డి పేర్కొన్నారు. ప్రపంచంలో ఎన్నో జాతులు వచ్చి పోయాయని, ప్రస్తుతం ఉన్న మూడు వేల పైచిలుకు జాతుల్లో ఒక్క తెలంగాణకు మాత్రమే మానవీయ కోణాన్ని ఆవిష్కరించే రీతిలో ప్రకృతిని ఆరాధించే అద్భుతమైన బతుకమ్మ సంప్రదాయం ఉన్నదని చెప్పారు. బతుకమ్మతోపాటు బోనాలు, గ్రామ దేవతల పేరుతో నిర్వహించే జాతరల ద్వారా మన సంస్కృతి, సంప్రదాయాలను కాపాడుకోవచ్చని తెలిపారు. అనంతరం మంత్రి జగదీశ్రెడ్డిని తెలంగాణ అమెరికా తెలుగు సంఘం
ప్రతినిధులు సన్మానించారు. ఆయా కార్యక్రమాల్లో ప్రభుత్వ విప్ గొంగిడి సునీతా మహేందర్ రెడ్డి, తాండూరు ఎమ్మెల్యే రోహిత్రెడ్డి, టెసాబ్ ఉపాధ్యక్షుడు గొంగిడి మహేందర్రెడ్డి, టీటీఏ ప్రతినిధులు పైళ్ల మల్లారెడ్డి, మోహన్రెడ్డి, టీఆర్ఎస్ రాష్ట్ర నాయకులు నంద్యాల దయాకర్రెడ్డి, టీఆర్ఎస్ అమెరికా విభాగం నేతలు గంగోని శ్రీనివాస్, అనిల్ ఎర్రబెల్లి, హరీందర్ తల్లాబెల్లి, టోనీ జన్ను, పొగాకు మహేశ్, అరవింద్ తకెళ్లపల్లి, నవీన్ జలగం పాల్గొన్నారు.