Tech Companies | హైదరాబాద్, జూన్ 8: తమ వినియోగదారులకు వాట్సాప్ ద్వారా ఓటీపీలు పంపించే విధానాన్ని అమెజాన్, గూగుల్, మైక్రోసాఫ్ట్ వంటి బడా టెక్ కంపెనీలు క్రమంగా విరమించుకుంటున్నాయి. మళ్లీ పాత పద్ధతిలోనే ఎస్ఎంఎస్ల ద్వారా ఓటీపీలను పంపించేందుకు మొగ్గు చూపుతున్నాయి. దీంతో మార్చి నెల నుంచి భారత్లో అంతర్జాతీయ ఎస్ఎంఎస్లు దాదాపు 50 నుంచి 70 శాతం పెరిగాయి. ఇటీవలి కాలంలో వాట్సాప్ కొత్తగా ‘అథెంటికేషన్ – ఇంటర్నేషనల్’ అనే కొత్త కేటగిరీని ప్రారంభించింది. దీని ద్వారా భారత్, ఇండోనేషియాలోని వినియోగదారులకు ఓటీపీలు పంపించే అంతర్జాతీయ సంస్థల నుంచి ఒక్కో మెసేజ్కు రూ.2.3 వసూలు చేస్తున్నది.
గతంలో వాట్సాప్ వసూలు చేసిన ధర కంటే ఇది దాదాపు 20 రెట్లు ఎక్కువ. అయితే, అంతర్జాతీయ ఎస్ఎంఎస్ ఛార్జీలతో పోలిస్తే ఇది సగం మాత్రమే. అయినప్పటికీ క్రమంగా టెక్ సంస్థలు ఎస్ఎంస్ల(సంక్షిప్త సందేశాలు) వైపు మళ్లుతున్నాయి. ఇలా ఎస్ఎంఎస్ల వైపు టెక్ కంపెనీలు మొగ్గు చూపడానికి ధర ఒక కారణమైతే, వాట్సాప్ యాజమాన్య సంస్థ మెటాతో ఈ సంస్థలకు వ్యాపారపరమైన పోటీ ఉండటం కూడా మరో కారణమని టెక్ నిపుణులు చెప్తున్నారు.