హైదరాబాద్, జూలై 15 (నమస్తే తెలంగాణ) : అధికారం కోసం నిరుద్యోగులను వాడుకున్న కాంగ్రెస్, ఇప్పుడు వారిని ఉగ్రవాదుల్లా చూస్తున్నదని మాజీ ఎమ్మెల్యే బాల్క సుమన్ విమర్శించారు. తెలంగాణ భవన్లో సోమవారం ఆయన మీడియాతో మాట్లాడుతూ సచివాలయం, ఉస్మానియా యూనివర్సిటీ చుట్టూ పోలీస్ బలగాలను దించారని, నిరుద్యోగులేమైనా ఉగ్రవాదులా? అని ప్రశ్నించారు.
రేవంత్ బీఆర్ఎస్ ఎమ్మెల్యేలు, ఎమ్మెల్సీల ఇండ్ల చుట్టూ తిరిగి కండువాలు కప్పుతున్నారని విమర్శించారు. కేవలం డీఎస్సీ వాయిదానే నిరుద్యోగులు అడుగుతున్నారని, గ్రూప్-2, 3 పోస్టులు పెంచుతామని కాంగ్రెస్ హామీ ఇచ్చిందని గుర్తుచేశారు. ‘గ్రూప్ -1 మెయిన్స్కు 1:100 నిష్పత్తిలో అభ్యర్థులను ఎంపిక చేయాలని అసెంబ్లీలో భట్టి డిమాండ్ చేయలేదా? నిరుద్యోగుల వద్దకు రాహుల్గాంధీ, ప్రియాంక గాంధీ, మల్లికార్జున ఖర్గేను తీసుకెళ్లి చిలకపలుకులు పలికించలేదా? అని ప్రశ్నించారు.
నిరుద్యోగులపై ప్రభుత్వం అక్రమ కేసులు పెడుతున్నదని, సీఎం అహంకార పూరిత మాటలపై మేధావులు ఎందుకు స్పందించడం లేదని? ప్రొఫెసర్ కోదండరాం, ఆకునూరి మురళి, ప్రొఫెసర్ నాగేశ్వర్ ఎకడికి పోయారని ప్రశ్నించారు. కోచింగ్ సెంటర్ల నిర్వాహకులను సీఎం విమర్శిస్తే ఎందుకు మాట్లాడలేదని నిలదీశారు.
నిరుద్యోగుల సమస్యలపై అసెంబ్లీ సమావేశాల్లో పోరాడుతామని ఇప్పటికే కేటీఆర్ ప్రకటించారని చెప్పారు. నిరుద్యోగులను పెయిడ్ ఆర్టిస్టులుగా చిత్రీకరిస్తున్నారని, నిరుద్యోగుల సమస్యలపై కమ్యూనిస్టులు ఎందుకు మాట్లాడటం లేదని ప్రశ్నించారు. అరెస్టు చేసిన నిరుద్యోగులందర్నీ వెంటనే విడుదల చేయాలని డిమాండ్ చేశారు.