హైదరాబాద్, నవంబర్ 17 (నమస్తే తెలంగాణ) : కొడంగల్ నియోజకవర్గంలో స్వతంత్ర అభ్యర్థిగా నామినేషన్ దాఖలు చేసి, ఆ తర్వాత ఉపసంహరించుకొన్న బాలకిషన్ యాదవ్ బీఆర్ఎస్ పార్టీలో చేరారు. శుక్రవారం మంత్రి మహేందర్ రెడ్డి ఆధ్వర్యంలో బాలకిషన్ యాదవ్కు మంత్రి కేటీఆర్ గులాబీ కండువా కప్పి, పార్టీలోకి సాదరంగా ఆహ్వానించారు.
సీఎం కేసీఆర్ నేతృత్వంలో రాష్ట్రంలో జరుగుతున్న అభివృద్ధి, కొడంగల్ ప్రజల శ్రేయస్సుకోసం ఎమ్మెల్యే నరేందర్రెడ్డి నిరంతరం పాటుపడుతుండటం చూసి తాను నామినేషన్ను ఉపసంహరించుకొన్నట్టు చెప్పారు. ఇకనుంచి బీఆర్ఎస్ పార్టీ అభ్యర్థి పట్నం నరేందర్ రెడ్డి విజయం కోసం శాయశక్తులా కృషి చేస్తానని తెలిపారు. దుద్యాల మండలంలో కాంగ్రెస్ అభ్యర్థి రేవంత్రెడ్డి ప్రచారం చేసిన రోజు బాలకిషన్ యాదవ్ బీఆర్ఎస్లో చేరడం చర్చనీయాంశమైంది.