నాంపల్లి కోర్టులు, జులై 11 (నమస్తే తెలంగాణ): ఫోన్ ట్యాపింగ్ కేసులో నిందితుల తరఫున గురువారం మూడోసారి డిఫాల్ట్ బెయిల్ పిటిషన్లు దాఖలయ్యాయి. ఈ సందర్భంగా నిందితుల తరఫున న్యాయవాది వాదనలు వినిపిస్తూ.. బెయిల్ పిటిషన్లను దాఖలు చేసినప్పుడు కోర్టు ఎదుట చార్జిషీట్ లేదని, అనివార్య కారణాల వల్ల దానిని కోర్టు వెనక్కి పంపిందని గుర్తుచేశారు. ఇప్పటివరకు కోర్టు చార్జిషీట్ను అంగీకరించలేదని తెలిపారు.
చార్జిషీట్తోపాటు అందులో పేర్కొన్న వస్తువులను పోలీసులు కోర్టుకు సమర్పించడంలో ఎందుకు విఫలమయ్యారని ప్రశ్నించారు. విచారణ అధికారి తప్పుల వల్ల రిమాండ్ ఖైధీలుగా నిందితులకు 120 రోజులు పూర్తయ్యాయని గుర్తుచేశారు. బెయిల్ పిటిషన్లపై పబ్లిక్ ప్రాసిక్యూటర్ అభ్యంతరం తెలిపారు. చార్జిషీట్ దాఖలు చేసిన తర్వాత డిఫాల్ట్ బెయిల్కు అవకాశం లేదని అన్నారు.
రెండుసార్లు డిఫాల్ట్ బెయిల్ పిటిషన్లు తిరస్కరించిన నేపథ్యంలో మరోసారి దాఖలు చేయడానికి వీలులేదని సుప్రీంకోర్టు ఇచ్చిన తీర్పులు తెలుపుతున్నాయని చెప్పారు. ఇరువైపులా వాదనలు విన్న కోర్టు తీర్పును శుక్రవారానికి రిజర్వు చేస్తున్నట్టు ప్రకటించింది. అంతకుముందు వెస్ట్జోన్ డీసీపీ విజయకుమార్, విచారణాధకారి, ఏసీపీ వెంకటగిరి, పీపీ సాంబశివారెడ్డి మేజిస్ట్రేట్ చాంబర్లోకి వెళ్లడంపై డిఫెన్స్ న్యాయవాది సురేందర్రావు అభ్యంతరం చెప్పారు. దీనిపై మేజిస్ట్రేట్ స్పందిస్తూ.. కోర్టు నిందితుల పక్షానే నిలబడుతుందని చెప్పారు.