నమస్తే నెట్వర్క్, జూలై 26 : కేంద్ర, రాష్ట్ర ప్రభుత్వాలు ప్రవేశపెట్టిన బడ్జెట్పై బీఆర్ఎస్, బీజేపీ నేతలు, కుల సంఘాల నాయకులు, కార్మికులు, ఆటో డ్రైవర్లు శుక్రవారం పెద్ద ఎత్తున నిరసనలు తెలిపారు. ఆయా జిల్లాల్లో ప్రభుత్వ దిష్టి బొమ్మలు దహనం చేశారు. విద్యారంగానికి నిధులు కేటాయించక పోవడంపై విద్యార్థి సంఘాలు మండిపడ్డాయి. భువనగిరిలో బీఆర్ఎస్ పట్టణాధ్యక్షుడు కిరణ్కుమార్, బీసీ విద్యార్థి సంఘం రాష్ట్ర ఉపాధ్యక్షుడు మోదీరాందేవ్ ఆధ్వర్యంలో కేంద్ర, రాష్ట్ర ప్రభుత్వాల దిష్టిబొమ్మను దహనం చేశారు.
ఉమ్మడి నిజామాబాద్ జిల్లాలో ఆటోడ్రైవర్లకు సంవత్సరానికి రూ.12 వేల జీవనభృతి అందజేస్తామన్న హామీని ప్రభుత్వం నిలబెట్టుకోలేదని ఆటోవాలాలు మండిపడ్డారు.ఆర్మూర్లో యునైటెడ్ స్టూడెంట్ ఫెడరేషన్ ఆఫ్ ఇండియా ఆధ్వర్యంలో ప్రభుత్వ దిష్టిబొమ్మను దహనం చేశారు. కామారెడ్డి జిల్లాకు నిధులు కేటాయించక పోవడాన్ని నిరసిస్తూ ఎల్లారెడ్డిలో బీజేపీ నేతలు సీఎం రేవంత్రెడ్డి దిష్టిబొమ్మను దహనం చేశారు. బీజేపీ ఎస్సీ మోర్చా జిల్లా అధ్యక్షుడు సుభాష్ ఆధ్వర్యంలో ఆదిలాబాద్ జిల్లా కేంద్రంలోని కలెక్టరేట్ చౌరస్తా వద్ద సీఎం రేవంత్రెడ్డి దిష్టిబొమ్మను దహనం చేశారు.
పెద్దపల్లిలోని కమాన్చౌరస్తా వద్ద బీజేపీ నాయకులు సీఎం రేవంత్రెడ్డి దిష్టిబొమ్మను దహనం చేశారు. బీజేపీ పట్టణ, మండలాధ్యక్షులు రాజగోపాల్, మేకల శ్రీనివాస్ ఉన్నారు. సూర్యాపేట జిల్లాకేంద్రంలో పీడీఎస్యూ, పీవైఎల్ ఆధ్వర్యంలో ర్యాలీ తీశారు. పీవైఎల్ రాష్ట్ర కార్యదర్శి కోలా లక్షీనారాయణ, పీడీఎస్యూ రాష్ట్ర ఉపాధ్యక్షుడు కిరణ్ పాల్గొన్నారు. భువనగిరి, నల్లగొండ జిల్లాలోని హాలియా, కొండమల్లేపల్లిలో ఎస్ఎఫ్ఐ ఆధ్వర్యంలో బడ్జెట్ ప్రతులను దహనం చేశారు.