న్యూస్నెట్వర్క్, (నమస్తేతెలంగాణ) జూలై 3: బొగ్గుగనుల వేలాన్ని రద్దు చేయాలంటూ బీఆర్ఎస్, టీబీజీకేఎస్ ఆధ్వర్యంలో సింగరేణి కార్మికులు కదం తొక్కారు. ఈ నెల 1న అన్ని బొగ్గుగనుల కార్మికులతో కలిసి నల్లబ్యాడ్జీలతో నిరసన చేపట్టిన తెలంగాణ బొగ్గుగని కార్మిక సంఘం.. బుధవారం పెద్దపల్లి జిల్లాలోని సింగరేణి సంస్థ రామగుండం డివిజన్ 1, 2, 3లో భారీ ఎత్తున నాయకులు, కార్యకర్తలతో ఆందోళన చేసింది. గోదావరిఖని చౌరస్తాలో టీబీజీకేఎస్ ఆర్జీ-1 ఉపాధ్యక్షుడు వడ్డెపెల్లి శంకర్ ఆధ్వర్యంలో, రామగుండం డివిజన్-2లోని యూనియన్ కార్యాలయం ఎదుట టీబీజీకేఎస్ ఆర్జీ-2 డివిజన్ ఉపాధ్యక్షుడు అయిలీ శ్రీనివాస్, సెంటినరీ కాలనీలోని తెలంగాణ చౌరస్తాలో టీబీజీకేఎస్ ఆర్జీ-3 ఉపాధ్యక్షుడు నాగెల్లి సాంబయ్య ఆధ్వర్యంలో, భద్రాద్రి కొత్తగూడెం జిల్లా మణుగూరు, ఇల్లెందు, కొత్తగూడెంలో కేంద్ర, రాష్ట్ర ప్రభుత్వాల దిష్టిబొమ్మలు దహనం చేశారు.
ఈ సందర్భంగా బొగ్గుగని కార్మిక సంఘం రాష్ట్ర అధ్యక్షుడు మిర్యాల రాజిరెడ్డి మాట్లాడుతూ.. కేంద్ర, రాష్ట్ర ప్రభుత్వాలు పెట్టుబడిదారులతో కుమ్మక్కై బొగ్గు గనులను ప్రైవేట్ వ్యక్తులకు అప్పగించేందుకు వేగంగా పనిచేస్తున్నారని ఆరోపించారు. తెలంగాణలోని బొగ్గు నిక్షేపాలను సింగరేణి సంస్థ ఆధ్వర్యంలో మాత్రమే తవ్వి తీయాలని డిమాండ్ చేశారు. ఇతర ఏ ప్రైవేట్ వ్యక్తులకు గనులను కేటాయించినా సహించేది లేదని హెచ్చరించారు. తెలంగాణ ప్రజలకు ఉపాధినిచ్చే సింగరేణి సంస్థను కాపాడుకోవడానికి కార్మిక సంఘాలు, ప్రజలు, రాజకీయ పార్టీలు ఐక్యంగా ముందుకొచ్చి పోరాటం చేయాలని ఆయన పిలుపునిచ్చారు. ఖమ్మం ఉమ్మడి జిల్లా బీఆర్ఎస్ వ్యవస్థాపక అధ్యక్షుడు దిండిగాల రాజేందర్ మాట్లాడుతూ.. బొగ్గు గనుల వేలం ఆలోచనను కేంద్ర ప్రభుత్వం వెనక్కి తీసుకోవాలని ఈ నెల 5 నుంచి 12వ తేదీ వరకు దశలవారీగా ఆందోళనలు చేపట్టనున్నట్టు తెలిపారు.
గనుల వేలాన్ని విరమించండి
కేంద్రం బొగ్గు గనుల వేలం నుంచి తెలంగాణ బ్లాకును తొలగించాలని సింగరేణి కార్మిక సంఘాల ఐక్యవేదిక వక్తలు డిమాండ్ చేశారు. సింగరేణి కార్మిక సంఘాల ఐక్యవేదిక ఆధ్వర్యం లో సోమాజిగూడ ప్రెస్క్లబ్లో నిర్వహిం చిన రౌండ్ టేబుల్ సమావేశంలో ప్రొఫెసర్ కోదండరాం మాట్లాడుతూ.. కేంద్ర ప్ర భుత్వం సహజ వనరుగా ఉన్న బొగ్గును ప్రైవేట్పరం చేసే కార్యక్రమానికి శ్రీకారం చుట్టిందని మండిపడ్డారు. హెచ్ఎంఎస్ రాష్ట్ర అధ్యక్షుడు రియాజ్ అహ్మద్ మాట్లాడుతూ కేంద్రం తీసుకువచ్చిన నూతన పా లసీతో సింగరేణి మనుగడ ప్రశ్నార్థకంగా మారే ప్రమాదం ఏర్పడిందన్నారు. సమావేశంలో ప్రొఫెసర్ హరగోపాల్, మాజీ ఎమ్మెల్సీ రాములునాయక్, ఏఐఎఫ్టీయూ గౌరవాధ్యక్షురాలు విమలక్క తదితరులు పాల్గొన్నారు.