హైదరాబాద్, జూలై 23 (నమస్తే తెలంగాణ): శాసనసభ సమావేశాలను ఈ నెల 31 వరకు నిర్వహించాలని బీఏసీ సమావేశంలో నిర్ణయించారు. 25న బడ్జెట్ ప్రవేశపెడతారు. 26, 28 తేదీల్లో అసెంబ్లీకి సెలవు ప్రకటించారు. 27న బడ్జెట్పై, 29, 30 తేదీల్లో పద్దులపై చర్చిస్తారు. 31న ద్రవ్యవినిమయ బిల్లును ప్రవేశపెడతారు. అసెంబ్లీ ఎజెండా అంశాలపై బీఏసీ సమావేశం మంగళవారం స్పీకర్ గడ్డం ప్రసాద్కుమార్ అధ్యక్షతన జరిగింది. సీఎం రేవంత్రెడ్డి, డిప్యూటీ సీఎం మల్లు భట్టివిక్రమార్క, శాసనసభ వ్యవహరాలశాఖ మంత్రి శ్రీధర్బాబు, బీఆర్ఎస్ నుంచి మాజీ మంత్రులు టీ హరీశ్రావు, వేముల ప్రశాంత్రెడ్డి, బీజేపీ నుంచి ఏలేటి మహేశ్వర్రెడ్డి, ఎంఐఎం నుంచి బలాల, సీపీఐ నుంచి కూనమనేని సాంబశివరావు, అసెంబ్లీ కార్యదర్శి నర్సింహాచార్యులు పాల్గొన్నారు.
అసెంబ్లీ సమావేశాలను 15 రోజుల పాటు నిర్వహించాలని, కాంగ్రెస్ ఇచ్చిన హామీలు అనేకం పెండింగ్లో ఉన్నాయని, లబ్ధిదారులకు పథకాలు అందడంలేదని, నిరుద్యోగుల సమస్యలు, ఆరు గ్యారెంటీలపై చర్చించాల్సి ఉందని మాజీ మంత్రి హరీశ్రావు సమావేశంలో పేర్కొన్నారు. సమావేశాలను 18 రోజులపాటు నిర్వహించాలని బీజేపీ నేత మహేశ్వర్రెడ్డి కోరారు. ప్రజా సమస్యలపై చర్చించేందుకు సభను ఎక్కువ రోజులు నడిపించాలని సీపీఐ సభ్యుడు కూనంనేని సాంబశివరావు కోరారు.
అందరి వినతులు తిరస్కరించిన ప్రభుత్వం 31 వరకే నిర్వహించాలని నిర్ణయించింది. శాసనమండలిలో బీఏసీ సమావేశం చైర్మన్ గుత్తా సుఖేందర్రెడ్డి అధ్యక్షతన జరిగింది. డిప్యూటీ చైర్మన్ బండ ప్రకాశ్, శాసనసభ వ్యవహరాలశాఖ మంత్రి శ్రీధర్బాబు, బీఆర్ఎస్ ఎమ్మెల్సీ మహమూద్ అలీ, బీజేపీ నుంచి ఏవీఎన్ రెడ్డి హాజరయ్యారు. 4రో జులు శాసనమండలి నిర్వహించనున్నారు.