నమస్తే తెలంగాణ నెట్వర్క్, జూలై 18 : అసెంబ్లీ ఎన్నికలకు ముందు కాంగ్రెస్ ఎన్నో హామీలు ఇచ్చి.. అధికారంలోకి రాగానే విస్మరించిందని ఆశ కార్యకర్తలు భగ్గుమంటున్నారు. ఈ మేరకు గురువారం వారు మంత్రులు, ఎమ్మెల్యేల ఇండ్లను ముట్టడించారు. నాగర్కర్నూల్ జిల్లా కొల్లాపూర్ పట్టణంలోని ఎక్సైజ్ శాఖ మంత్రి జూపల్లి కృష్ణారావు ఇంటిని ముట్టడించి పెద్దపెట్టున నినాదాలు చేశారు. నిజామాబాద్ రూరల్ ఎమ్మెల్యే భూపతిరెడ్డి క్యాంపు కార్యాలయం ఎదుట బైఠాయించారు. అనంతరం ఎమ్మెల్యేకు డిమాండ్లతో కూడిన వినతిపత్రాన్ని సమర్పించారు. ఆర్మూర్ ఎమ్మెల్యే పైడి రాకేశ్రెడ్డి క్యాంపు కార్యాలయం ఎదుట ఆశ కార్యకర్తలు నిరసన తెలిపారు. మంచిర్యాల, చెన్నూరు ఎమ్మెల్యేల ఇళ్ల ముందు ఆశ కార్యకర్తలు ధర్నా చేశారు. ఈ సందర్భంగా పలువురు ఆశ కార్యకర్తలు మాట్లాడుతూ.. తమకు ఫిక్స్డ్ వేతనంతోపాటు ప్రమాద బీమా, రిటైర్మెంట్ బెనిఫిట్స్ అమలు చేయాలని డిమాండ్ చేశారు. సమస్యల పరిష్కారం కోసం వెంటనే ఐఏఎస్ అధికారితో కమిటీ వేయాలని కోరారు.
గ్రేటర్ హైదరాబాద్లోని బోయిన్పల్లిలో మల్కాజిగిరి ఎమ్మెల్యే మర్రి రాజశేఖర్రెడ్డి క్యాంపు కార్యాలయం వద్ద ఆశ కార్యకర్తలు బైఠాయించారు. ఈ సందర్భంగా ఎమ్మెల్యే మర్రి రాజశేఖర్రెడ్డి వారితో మాట్లాడుతూ.. మాతా శిశు సంరక్షణలో ఆశ కార్యకర్తలు నిరంతరం కృషి చేస్తున్నారని కొనియాడారు. మాతృత్వ శిశు మరణాల రేటు గణనీయంగా తగ్గిపోవడానికి ఆశ వర్కర్ల సేవలు అమోఘమని అన్నారు. ప్రస్తుతం ఇస్తున్న జీతాలు సరిపోవడంలేదని, వారి జీతాన్ని కనీసం రూ.18 వేలకు పెంచాలని ప్రభుత్వాన్ని డిమాండ్ చేశారు. రానున్న అసెంబ్లీ సమావేశాల్లో ఆశ వర్కర్ల జీతాలతోపాటు వారి సంక్షేమం కోసం ప్రభుత్వం తీసుకోవాల్సిన అంశాలను ప్రస్తావిస్తానని తెలిపారు. ఆశలకు పెడుతున్న పరీక్షలను రద్దుచేయాలని, ఏడాదికి 20 రోజులు జీతంతో కూడిన సెలవులు ఇవ్వాలని ప్రభుత్వానికి సూచించారు. వీరికి ఈఎస్ఐ, పీఎఫ్ సౌకర్యాలు కల్పించాలని, శ్రమ దోపిడీ చేయవద్దని ప్రభుత్వాన్ని కోరారు.