ఆర్మూర్టౌన్, మే 15: ఆర్మూర్ ఎమ్మెల్యే పైడి రాకేశ్రెడ్డి ఓ మహిళా ఉద్యోగిపట్ల దురుసుగా ప్రవర్తించారు. అందరి ముందే ‘గెటవుట్’ అంటూ అవమానించారు. దీంతో మనస్తాపానికి గురైన ఆమె తన ఉద్యోగానికి రాజీనామా చేశారు. పట్టణ పేదరిక నిర్మూలణ సంస్థ (మెప్మా) రిసోర్స్ పర్సన్ (ఆర్పీ)గా దోండి గంగామణి ఆర్మూర్లో 14 ఏండ్లుగా పనిచేస్తున్నారు. సోమవారం జరిగిన లోక్సభ ఎన్నికల్లో ఆర్పీలకు సైతం డ్యూటీ వేశారు.
పోలింగ్ కేంద్రాలను పరిశీలించేందుకు వచ్చిన స్థానిక ఎమ్మెల్యే రాకేశ్రెడ్డి.. డ్యూటీలో ఉన్న గంగామణితో దురుసుగా మాట్లాడారు. ‘ఇక్కడ ఎందుకు ఉన్నావు? బయటకు వెళ్లు.. గెటవుట్’ అని అందరి ముందే ఆమెను అవమానించారు. మున్సిపల్ కమిషనర్ తమకు ఇక్కడ డ్యూటీ వేశారని ఆమె ఎంతచెప్పినా ఎమ్మెల్యే వినిపించులేదు. ‘ఆర్పీలకు ఇక్కడ ఏం పని? ఎందుకు వచ్చావు? వెళ్లిపో’ అంటూ ఆమెను పోలింగ్ బూత్ నుంచి బయటకు పంపించారు.
దీంతో రోదిస్తూ గంగామణి అక్కడి నుంచి వెళ్లిపోయారు. అందరి ముందు అవమానం జరగడంతో మనస్తాపానికి గురైన గంగామణి.. మున్సిపల్ కమిషనర్ రాజుకు బుధవారం రాజీనామా లేఖను అందజేశారు. తన రాజీనామాకు కారణం ఎమ్మెల్యే రాకేశ్రెడ్డేనని ఆమె స్పష్టం చేశారు. న్యాయం కోసం, ధర్మం కోసం పని చేస్తానని చెప్పుకునే ఎమ్మెల్యేకు ఆడవారితో ఎలా మాట్లాడాలో తెలియదా? అని ఆమె ప్రశ్నించారు. ఎమ్మెల్యేగా ఉండి అందరినీ సమానంగా చూడాలని, ఎవరినీ కించపరిచేలా ప్రవర్తించుకూడదని హితవు పలికారు.