హైదరాబాద్, జూన్ 19 (నమస్తే తెలంగాణ) : ఖమ్మంలో బుధవారం ప్రారంభమైన టీయూడబ్ల్యూజే (ఐజేయూ) రాష్ట్ర మహాసభలో యూనియన్కు చెందిన ఇద్దరు కీలక నేతల మధ్య వాగ్వాదం జరిగింది. ఉదయం ప్రారంభ సభ, మధ్యాహ్నం రాష్ట్ర డెలిగేట్ల సమావేశం నిర్వహించారు. ఇందులో యూనియన్ కార్యకలాపాల నివేదికను కార్యదర్శి రాష్ట్ర నాయకులకు చదివి వినిపించారు.
ఈ క్రమంలో పలువురు వక్తలు మాట్లాడిన తర్వాత సమావేశం ముగిసినట్టు ప్రకటించగా ఐజేయూ మాజీ అధ్యక్షుడు, ఆంధ్రప్రదేశ్ ప్రభుత్వ మీడియా మాజీ సలహాదారు దేవులపల్లి అమర్ తీవ్ర అభ్యంతరం వ్యక్తం చేశారు. తాను మాట్లాడుతానని అధ్యక్షుడిని ముందుగానే అనుమతి అడిగానని, అయినా ఉద్దేశపూర్వకంగా సమావేశాన్ని ముగించడం వెనుక ఆంతర్యమేమిటని ప్రశ్నించారు.
తనకు మాట్లాడే అవకాశం ఇవ్వకపోవడానికి కారణమేమిటో చెప్పాలని అమర్ పట్టుబట్టగా తనకు దురుద్దేశాలను ఆపాదించడం మంచిది కాదని, ఎవరిని ఎప్పుడు మాట్లాడించాలన్న అంశం అధ్యక్ష స్థానంలో ఉన్నవారిది మాత్రమేనని తెలంగాణ మీడియా అకాడమీ చైర్మన్, ప్రస్తుత అధ్యక్షుడు శ్రీనివాస్రెడ్డి బదులిచ్చినట్టు తెలిసింది. ఈ క్రమంలో ఇద్దరూ కొంతసేపు వాదనకు దిగగా నాయకులు జోక్యం చేసుకొని సర్దిచెప్పినట్టు సమాచారం.
ఐజేయూ జాతీయ అధ్యక్షుడిగా ఉన్న సమయంలో ఏపీ ప్రభుత్వ మీడియా సలహాదారుగా అమర్ నియమితులయ్యారు. ఆ సమయంలో ఐజేయూ జాతీయ అధ్యక్ష పదవికి రాజీనామా చేశారు. ప్రస్తుత ఐజేయూ అధ్యక్షుడు తెలంగాణ మీడియా అకాడమీ చైర్మన్గా నియమితులు కావడంతో అదే సూత్రాన్ని వర్తింపజేయాలని అమర్ వర్గీయులు డిమాండ్ చేస్తున్నట్టు సమాచారం. ఇలానే మంగళవారం జరిగిన యూనియన్ రాష్ట్ర కార్యవర్గ సమావేశంలోనూ కొత్త కమిటీ ఎన్నిక నిర్ణయంపైనా ఓ వర్గం కినుక వహించినట్టు ప్రచారం జరుగుతున్నది.