పెగడపల్లి, జూలై 24: స్వరాష్ట్రంలో పునర్జీవం పోసుకున్న చేనేత రంగం ప్రస్తుతం మళ్లీ సంక్షోభంలోకి వెళ్లింది. అటు కేంద్రం, ఇటు రాష్ట్రం చూపుతున్న వివక్షతో మళ్లీ మరణమృదంగం మోగుతున్నది. కాంగ్రెస్ పాలనలో సిరిసిల్ల ప్రాంతంలో ఇప్పటికే ఎనిమిది మంది చనిపోగా.. రాష్ట్రవ్యాప్తంగా దాదాపు పన్నెండు మంది నేతన్నలు ఆకలిచావులు, ఆత్మహత్యలు చేసుకోవడం కలకలం రేపుతున్నది. తాజాగా జగిత్యాల జిల్లాలో మరో నేతన్న తనువుచాలించాడు. వివరాలు ఇలా.. జగిత్యాల జిల్లా పెగడపల్లి మండలం మ్యాకవెంకయ్యపల్లి గ్రామానికి చెందిన గుండేటి మల్లయ్య (55)కు ఇద్దరు కొడుకులు, ఓ కూతురు ఉండగా, వారికి వివాహాలు జరిగి ఇతర ప్రాంతాల్లో బతుకుతున్నారు.
మల్లయ్య తన భార్య రాజేశ్వరితో కలిసి ఇక్కడే చీరలు నేస్తూ, జీవనం సాగిస్తున్నాడు. గత కేసీఆర్ ప్రభుత్వంలో ఇచ్చిన ఆర్డర్లతో చేతినిండా పనితో దర్జాగా బతికాడు. ఏడు నెలలుగా ఉపాధి లేక కుటుంబ పోషణ భారంగా మారింది. దీనికితోడు కూతురి వివాహం కోసం చేసిన అప్పులు అలాగే ఉండటంతో తీవ్ర మనస్తాపానికి లోనయ్యాడు. బుధవారం భార్య రాజేశ్వరి వ్యవసాయ కూలీ పనులకు వెళ్లగా, మల్లయ్య తన సాంచాల కార్ఖానాలోనే ఉరేసుకున్నాడు. రాజేశ్వరి ఫిర్యాదు మేరకు పెగడపల్లి ఏఎస్సై సత్తయ్య, ఎస్హెచ్వో రవీందర్ కేసు నమోదు చేసి దర్యాప్తు చేస్తున్నారు.