కారేపల్లి, జూలై 4 : భూవివాదం కారణంగా ఖమ్మం జిల్లాలో మరోరైతు ఆత్మహత్యకు ప్రయత్నించాడు. ఇదే జిల్లాలోని చింతకాని మండలం ప్రొద్దుటూరుకు చెందిన రైతు బోజెడ్ల ప్రభాకర్ బలవన్మరణం నుంచి తేరుకోకముందే ఇలాంటిదే మరో ఘటన చోటుచేసుకోవడం చర్చనీయాంశమైంది. ఏకంగా ఆర్టీఐ మాజీ కమిషనర్ శంకర్నాయక్ తన భూమిని ఆక్రమించాడని గురువారం ఓ రైతు పురుగుల మందుతాగాడు. అతడి పరిస్థితి విషమంగా ఉండటంతో కుటుంబసభ్యులు ఖమ్మం దవాఖానలో చేర్పించారు.
స్థానికులు తెలిపిన వివరాల ప్రకారం.. ఖమ్మం జిల్లా కారేపల్లి మండలం ఉసిరికాయలపల్లికి చెందిన పచ్చిపాల భద్రయ్యకు చెందిన ఎకరంన్నర భూమి విషయంలో మూడేండ్ల్లుగా వివాదం కొనసాగుతున్నది.ఇదే గ్రామానికి చెందిన పచ్చిపాల భద్రయ్య, సోమయ్య, రామ య్య, మల్లయ్య అన్నదమ్ములు. వీరిలో భద్రయ్యది మినహా మిగతావారి వాటా భూమిని ఆర్టీఐ మాజీ కమిషనర్ శంకర్నాయక్ కుటుంబ సభ్యులు కొనుగోలు చేశారు.
అధికారుల అండదండలతో సర్వేనంబర్లకు బై నంబర్లు వేసి పక్కనే ఉన్న భద్రయ్యకు చెందిన 1.20 ఎకరాల భూమిని కొనుగోలు చేసినట్టు శంకర్నాయక్ పత్రాలు సృష్టించారని, బాధిత కుటుంబం ఆరోపిస్తున్నది. ఈ భూమి వివాదంపై ఇరువర్గాలూ కోర్టును ఆశ్రయించి ఇంజంక్షన్ ఆర్డర్లు కూడా తెచ్చుకున్నాయి. గురువారం భద్రయ్యకు చెందిన భూమిని శంకర్నాయక్ మనుషులు ట్రాక్టర్లతో దున్నుతుండగా భద్రయ్య, అతడి భార్య భాగ్యమ్మ అడ్డుకున్నారు.
తమకు ఇంజంక్షన్ ఆర్డర్ ఉందని చెప్పారు. శంకర్నాయక్ మనుషులు భూమిని దున్నుతుండడంతో మనస్తాపానికి గురైన భద్రయ్య పురుగుల మందు తాగాడు. అతడిని కుటుంబసభ్యులు గ్రామస్తుల సాయంతో 108లో ఇల్లెందు ప్రభుత్వ దవాఖానకు తీసుకెళ్లారు. మెరుగైన వైద్యం కోసం అక్కడి నుంచి ఖమ్మం ప్రభుత్వ దవాఖానకు తరలించారు. కాగా అతడి పరిస్థితి విషమంగా ఉన్నట్టు కుటుంబసభ్యులు తెలిపారు. తమకు న్యాయం చేయాలని కోరుతూ గురువారం రాత్రి కారేపల్లి పోలీస్స్టేషన్లో ఫిర్యాదు చేశారు. భాగ్యమ్మ ఫిర్యాదు మేరకు పోలీసులు కేసు నమోదుచేసుకున్నారు.