హైదరాబాద్, మే 15 (నమస్తే తెలంగాణ): హైదరాబాద్ నగరంలోని నెహ్రూ జూలాజికల్ పారులో అరుదైన జంతుజాలాల మనుగడ ప్రశ్నార్థకంగా మారింది. నిత్యం పిల్లల నుంచి పెద్దల దాకా లక్షలాది మంది సందర్శకులను అలరిస్తున్న జంతువుల వరుస మరణాలు అటవీశాఖ అధికారుల నిర్లక్ష్యానికి నిలువుటద్దంగా నిలుస్తున్నది. కిడ్నీ వ్యాధులతోపాటు వివిధ అవయవాలు చెడి జూపార్కులోని పలు జంతువులు మృత్యువాత పడ్డాయి.
కిడ్నీవ్యాధులతోనే 60కి పైగా మరణించాయని జూపారు వెటర్నరీ వైద్యాధికారుల గణాంకాలే వెల్లడిస్తున్నాయి. ప్రతీనెలా ఏదో ఒక జంతువు కిడ్నీ వ్యాధి బారిన పడి చికిత్స పొందుతూ మరణిస్తున్నది. దీనంతటికీ జూపార్కులోకి వచ్చే మీరాలం చెరువు కలుషిత నీరే కారణమని వైద్యులు తేల్చారు. ఆ చెరువు నీరు తాగడం వల్లే తరచూ జూపారు జంతువుల కిడ్నీలు దెబ్బతింటున్నాయని పశువైద్యాధికారుల పరీక్షల్లో తేలింది.
జంతువుల ప్రాణాలకు ముప్పుగా పరిణమించిన మీరాలం చెరువు కలుషిత జలాలు జూపార్కులోకి రాకుండా నిరోధించడంలో రాష్ట్ర అటవీశాఖ విఫలమైందన్న విమర్శలు వినిపిస్తున్నాయి. జూపారులో కలుషిత జలాలను శుద్ధి చేసేందుకు సీవరేజీ ట్రీట్మెంట్ ప్లాంట్లు ఏర్పాటు చేయాలని జూపారు క్యూరేటర్ సిఫారసు చేసినా సరారు సరైన చర్యలు తీసుకోవడం లేదనే ఆరోపణలు ఉన్నాయి. ఇలాగే కలుషిత జలాలు వస్తుంటే భవిష్యత్తులో జూపారులో జంతువులన్నీ అంతర్థానం అయ్యే పరిస్థితులు నెలకొంటాయని జంతు ప్రేమికులు ఆందోళన వ్యక్తం చేస్తున్నారు.
కనువిందు చేస్తున్న అరుదైన జంతువులు
నెహ్రూ జంతు ప్రదర్శనశాలలో మొత్తం 2,240 జంతువులు ఉన్నాయి. వీటిలో 664 క్షీరదాలు, 97 రకాల 1,227 పక్షులు, 38 రకాలకు చెందిన 341 సరీసృపాలు, 8 ఉభయచరాలు ఉన్నాయి. బాతులు, కొంగలు, వివిధ రకాల రంగురంగుల పక్షులు, చిలుకలు, ఎతైన జిరాఫీలు, అడవిదున్నలు, చిరుతలు, పులులు, సింహాలు, తాబేళ్లు, కోతులు సందర్శకులను కనువిందు చేస్తున్నాయి.
పోస్టుమార్టం రిపోర్టులో తేలిన వాస్తవాలు
జూపారులో పలు జంతువులు మీరాలం చెరువు కలుషిత జలాలు తాగడం వల్లే వాటి కిడ్నీలు, ఇతర అవయవాలు చెడి మరణించాయని హైదరాబాద్ వెటర్నరీ కళాశాల పశుసంవర్థక శాఖ ప్రొఫెసర్లు స్పష్టం చేశారు. మంగళవారం జూపారులో అరుదైన రాయల్ బెంగాల్ జాతికి చెందిన అభిమన్యు అనే మగ తెల్లపులి రెండు కిడ్నీలు చెడి మరణించిందని పశు వైద్యాధికారుల పరీక్షల్లో తేలింది. గత మార్చి 15న జూపార్కు ప్రవేశ మార్గంలోనే సందర్శకులకు కనువిందు చేసిన 125 ఏండ్ల వయసున్న అరుదైన గాలాపాగోస్ జెయింట్ తాబేలు మృత్యవాత పడింది.
కిడ్నీతోపాటు ఇతర అవయవాల వైఫల్యం వల్లే ఆ తాబేలు మరణించిందని పశుసంవర్ధక శాఖ వైద్యులు, రాజేంద్రనగర్ వెటర్నరీ కళాశాల బయోలాజికల్, రీసెర్చ్ ఇన్స్టిట్యూట్ శాస్త్రవేత్తలూ తేల్చారు. మీరాల చెరువు నీటిలో నైట్రేట్లు, బ్యాక్టీరియల్ ఇన్ఫెక్షన్లు, కెమికల్స్, వివిధ రకాల మెటల్స్ ఉన్నాయని ల్యాబ్ పరీక్ష నివేదికల్లో వెల్లడైందని జూపారు వెటర్నరీ డిప్యూటీ డైరెక్టర్ డాక్టర్ ఎంఏ హకీం తెలిపారు. జూపారులో జంతువుల కోసం ఆర్వో వాటర్ప్లాంట్ నీటిని సరఫరా చేస్తున్నామని జూపారు ప్రజా పౌరసంబంధాల శాఖ అధికారి షేక్ హనీఫ్ తెలిపారు.
కాలుష్యం కాటు నుంచి కాపాడండి
జంతువులను కాలుష్యపు కాటు నుంచి కాపాడాల్సిన అవసరం ఉన్నది. పరిశ్రమల వ్యర్థ జలాల వల్ల మీరాలం చెరువు అత్యంత కాలుష్య కాసారంగా మారింది. జూపారు జంతువులు మరణించకుండా తెలంగాణ అటవీశాఖ అధికారులు ఇప్పటికైనా మేలుకోవాలి. కాలుష్యాన్ని నివారించేందుకు మున్సిపల్ శాఖ సత్వర చర్యలు తీసుకోవాలి.
– డాక్టర్ లూబ్నా సర్వత్, పర్యావరణ ప్రేమికురాలు, హైదరాబాద్