పెగడపల్లి, జూన్ 20: జగిత్యాల జిల్లా పెగడపల్లి మండలం ఎల్లాపూర్లో పారిశుధ్య కార్మికుడిగా పనిచేస్తున్న లింగంపల్లి యోగేశ్ కొడుకు శ్రీరాం ప్రభుత్వ పాఠశాలలో ఐదోతరగతి చదువుతున్నాడు. బుధవారం పాఠశాల ప్రారంభమైన కొద్దిసేపటికే మంచి నీళ్ల బాటిల్ కొనుక్కురావాలని ఓ ఉపాధ్యాయురాలు చె ప్పడంతో శ్రీరాం దుకాణానికి వెళ్తుం డగా కింద పడి గాయపడ్డాడు. అలాగే పాఠశాలకు రాగా ఉపాధ్యాయులు ప్రథమ చికిత్స కూడా చేయించకుండా నిర్లక్ష్యంగా ఓ పక్కన కూర్చోబెట్టారు.
అదే సమయంలో యోగేశ్ పాఠశాలకు రావడంతో శ్రీరాం ఏడుస్తూ తండ్రి దగ్గరకు వెళ్లాడు. కనుబొమ్మపై గాయం కావడంతో ప్రాథమిక చికిత్స జరిపించి, గురువారం కరీంనగర్లోని ఓ దవాఖానలో పరీక్షలు చేయించాడు. తన కొడుకు తీవ్రమైన నొప్పితో బాధపడుతున్నట్టు యోగేశ్ ఆవేదన వ్యక్తం చేశాడు. తన కొడుకు పట్ల నిర్లక్ష్యంగా వ్యవహరించిన ఉపాధ్యాయులపై చర్యలు తీసుకోవాలని ఆయన కోరారు. ఈ విషయమై ఎంఈవో శ్రీనివాస్ గురువారం విచారణ చేపట్టారు. ఇందుకు బాధ్యులైన ఉపాధ్యాయురాలికి మెమో జారీ చేశారు.