ఎదులాపురం, జూలై 15 : కన్నకొడుకు ఇంట్లోకి రానివ్వడం లేదంటూ ఆదిలాబాద్ పట్టణానికి చెందిన 90 ఏండ్లకుపైబడిన వృద్ధ దంపతులు సోమవారం ప్రజావాణిలో కలెక్టర్కు ఫిర్యాదు చేశారు. స్థానిక క్రాంతినగర్కు చెందిన దేవ్రావు, విఠబాయి(90) దంపతులకు ఇద్దరు కుమారులు, ఓ కూతురు ఉన్నారు.
కొంతకాలం క్రితం పెద్ద కొడుకు మరణించాడు. చిన్న కుమారుడు గంగారాం ప్రైవేటు కారు డ్రైవర్గా పనిచేస్తున్నాడు. వృద్ధ దంపతులు ప్రస్తుతం ఆదిలాబాద్ రూరల్ మండలంలోని అర్లీ(బీ)లో కూతురు విమల వద్ద ఉంటున్నారు. తన కుమారుడు తమను ఇంట్లోకి రానివ్వడం లేదని, ఆలన పాలన చూసుకోవడం లేదంటూ కలెక్టర్కు ఫిర్యాదు చేశారు.
స్పందించిన కలెక్టర్ తగిన చర్యలు తీసుకోవాలని అధికారులకు సూచించారు. ఆటోలో తిరిగి కూతురు విమల గ్రామం అర్లీ బీ వెళ్తుండగా తీవ్ర అనారోగ్యానికి గురైన విఠబాయి మార్గమధ్యంలో మరణించింది. కుమారుడు గంగారాం రాకపోవడంతో కూతురు విమల, అల్లుడు పాండురావు వృద్ధురాలికి అంత్యక్రియలు నిర్వహించారు.