హైదరాబాద్ సిటీబ్యూరో, మే 11 (నమస్తే తెలంగాణ): జలావరణాన్ని, జలచరాలను పరిరక్షించేందుకు హైదరాబాద్లోని సెంటర్ ఫర్ సెల్యులర్ అండ్ మాలిక్యులర్ బయాలజీ (సీసీఎంబీ) సరికొత్త ఎన్విరాన్మెంటల్ డీఎన్ఏ (ఈడీఎన్ఏ) విధానాన్ని రూపొందింది. దీన్ని తొలిసారి తూర్పు కనుమల్లో వినియోగించి అక్కడి జలవనరుల్లో చొరబడిన నిషేధిత క్యాట్ఫిష్ సంతతిని సమర్థంగా గుర్తించింది. మత్స్య సంపదకు తీవ్ర నష్టం కలిగించే క్యాట్ఫిష్ను సంప్రదాయ పద్ధతుల్లో గుర్తించడం కష్టం.
అందుకే ఈ-డీఎన్ఏ విధానాన్ని సీసీఎంబీ డెవలప్ చేసింది. దీనిలో భాగంగా నీటిలోని నమూనాలను సేకరించి, అందులో ఉండే ఈడీఎన్ఏను ప్రత్యేక పద్ధతిలో వేరుచేస్తారు. అనంతరం క్యూపీసీఆర్ ఆంప్లికేషన్ పద్ధతిలో డీఎన్ఏను విశ్లేషించి క్యాట్ఫిష్ సంతతి ఏ స్థాయిలో ఉన్నదో తెలుసుకుంటారు. క్యాట్ఫిష్ను వేగంగా గుర్తించేందుకు ఈ విధానం ఎంతో దోహదపడుతుందని సీసీఎంబీ పరిశోధకులు చెప్తున్నారు.