పెద్దపల్లి : మరణంలోనూ పరోపకారం అనే నానుడిని నిజం చేశారు పెద్దపల్లికి చెందిన గుంటి మొండయ్య(73) అనే మాజీ సింగరేణి ఉద్యోగి. పెద్దపల్లి జిల్లా (Peddapalli District)పెద్దబొంకూరుకు చెందిన మొండయ్య (Mondaiah) బుధవారం తెల్లవారుజామున గుండెపోటుతో మృతి చెందాడు. సుమారు 15 సంవత్సరాలకు పైగా కుటుంబానికి దూరంగా ఉంటున్న ఆయన పెద్దపల్లి భారత్ నగర్ కు చెందిన సురేందర్ అనే రిటైర్డ్ ఉపాధ్యాయుడు ఇంట్లో ఉంటున్నాడు. అభ్యుదయ భావాలు కలిగిన మొండయ్య తన మరణం తర్వాత తన పార్ధీవదేహాన్ని మెడికల్ కాలేజీ (Medical College ) కి ఇవ్వాలని సూచించాడు.
ఈ నేపథ్యంలో బుధవారం అకాల మరణం చెందిన మొండయ్య మృతదేహాన్ని (Dead Body) ఆయన భార్య స్వరూప, కుమారుడు అనిల్, కూతురు ఇందిరా, తమ్ముడు రాజవీరు, సోదరి సరోజన స్పందించి మెడికల్ కాలేజీకి ఇవ్వడానికి ముందుకు వచ్చారు. సదాశయ ఫౌండేషన్, రామగుండం లయన్స్ క్లబ్, మగువ లయన్స్ క్లబ్ ఆధ్వర్యంలో గోదావరిఖనిలోని సిమ్స్ మెడికల్ కాలేజీకి మృతదేహాన్ని అప్పగించారు.
ఈ సందర్భంగా కుటుంబ సభ్యులను మెడికల్ కాలేజీ ప్రిన్సిపాల్ హిమబిందు సింగ్, అనాటమి హెచ్ఓడీ అనిల్ రాహుల్, సదాశయ, లయన్స్ క్లబ్, మగువ ప్రతినిధులు లింగమూర్తి, భీష్మాచారి, కే.ఎస్.వాసు, రాజేందర్, బంక కళావతి, లక్ష్మీవాణి, రామస్వామి, బెణిగోపాల్ త్రివేది అభినందించారు. మొండయ్య తీసుకున్న నిర్ణయాన్ని గౌరవిస్తూ, పార్ధీవ దేహానికి సెల్యూట్ చేసి నివాళులర్పించారు.