హైదరాబాద్, జూన్ 3(నమస్తే తెలంగా ణ): రాష్ట్రంలో వారం రోజులు పాటు భారీ వర్షాలు కురిసే అవకాశం ఉన్నందున అధికారులు అప్రమత్తంగా ఉండాలని వ్యవసాయశాఖ మంత్రి తుమ్మల నాగేశ్వరరావు సూచించారు. రైతులకు అవసరమైన పత్తి, జీలుగ విత్తనాలను అందుబాటులో ఉంచాలని ఆదేశించారు. సోమవారం విత్తనాలు, వానకాలం సీజన్ ప్రారంభంపై సమీక్షించారు. ఈ సందర్భంగా మంత్రి మాట్లాడుతూ.. అన్ని జిల్లాల కలెక్టర్లు క్షేత్రస్థాయి అధికారులను సమన్వ యం చేసుకుంటూ రైతులకు ఇబ్బంది లేకుం డా చర్యలు తీసుకోవాలని తెలిపారు.
పచ్చిరొట్ట, పత్తి విత్తనాలను జిల్లాలకు సరఫరా చేశామని, వాటిని రైతులకు అందేలా చర్యలు తీసుకోవాలని ఆదేశించారు. ఇప్పటి వరకు 84.53 లక్షల పత్తి విత్తన ప్యాకెట్లను సరఫరా చేయగా రైతులు 25.10 లక్షల ప్యాకెట్లను కొనుగోలు చేసినట్లు తెలిపారు. 97,109 క్వింటాళ్ల పచ్చిరొట్ట విత్తనాలను అందుబాటులో ఉంచగా రైతులు 84,412 క్వింటాళ్లను కొనుగోలు చేశారన్నారు. అనుమతి లేకుండా ప్రత్తి విత్తనాల ప్యాకెట్లు విక్రయిస్తున్న 33 మందిపై కేసులు పెట్టి రూ. 2 కోట్ల విలువగల 118.29 క్వింటాళ్ల విత్తనాలను స్వాధీనం చేసుకున్నట్లు వెల్లడించారు.