Agriculture | హైదరాబాద్, జూన్ 30(నమస్తే తెలంగాణ): సన్న రకం ధాన్యానికి క్వింటాకు రూ.500 చొప్పున బోనస్ ఇస్తామని ప్రకటించిన రాష్ట్ర ప్రభుత్వం ఇప్పటికీ జాబితాను ప్రకటించలేదు. ఒకవైపు వానకాలం సీజన్కు వరి నార్లు పోసే దశ ముగుస్తున్నప్పటికీ, సన్న రకాల జాబితాను వ్యవసాయ శాఖ విడుదల చేయలేదు. ఒకవేళ తాము సాగు చేసిన సన్నాలు ప్రభుత్వ జాబితాలో లేకపోతే పరిస్థితి ఏమిటని రైతులు ఆందోళన వ్యక్తంచేస్తున్నారు.
మే 20న జరిగిన మంత్రివర్గ సమావేశంలో సన్న రకం ధాన్యానికి రూ.500 బోనస్ ఇవ్వాలని ప్రభుత్వం నిర్ణయించింది. సన్నాల జాబితాను రెండు రోజుల్లో వ్యవసాయ శాఖ విడుదల చేస్తుందని మంత్రి పొంగులేటి శ్రీనివాస్రెడ్డి ప్రకటించి నెల దాటిపోయింది. కానీ, సన్నాల జాబితా జాడే లేదు. అయితే సన్నాల గుర్తింపుపై ప్రభుత్వం నిపుణుల కమిటీని ఏర్పాటుచేసింది.
ఈ కమిటీ పలుమార్లు భేటీ అయినప్పటికీ జాబితాపై స్పష్టత రాలేదు. నాలుగు రోజుల క్రితం జరిగిన భేటీలో కూడా సన్నాల జాబితాను ఖరారు చేయలేదు. గత నెలలో వ్యవసాయ విశ్వవిద్యాలయం నిర్వహించిన విత్తన మేళాలో యూనివర్సిటీ అధికారికంగా 19 రకాల సన్న ధాన్యాలను సూచించింది. అయితే మార్కెట్లో వందల సంఖ్యలో సన్న రకాలు లభిస్తున్నాయి. దీంతో ఏయే రకాలు సన్నాల జాబితాలోకి వస్తాయనే అంశంపై వ్యవసాయ శాఖ స్పష్టత ఇవ్వాల్సిన అవసరం ఉన్నది.